पोखरा- लामो समयदेखि ठप्प विश्वकै चर्चित पदमार्ग अन्नपूर्ण बेसक्याम्प (एबिसी) असोज पहिलो सातादेखि सञ्चालनमा आउने भएको छ । असोज ५ गतेदेखि अन्नपूर्ण क्षेत्रका सबै होटल खुला हुने भएका हुन् ।

दोस्रो चरणको लकडाउनपछि ठप्प होटल असोजदेखि खुल्ने छोम्रोङ पर्यटन व्यवसायी समितिका सचिव दिलीप गुरुङले बताए । ‘असोज ५ देखि यो क्षेत्रका होटल पाहुन राख्ने गरी खुल्छन् । कोभिड १९ संक्रमणको दर पनि कम भइराखेको छ । धेरै जसोले भ्याक्सिन पनि लगाइसकेको अवस्थामा हामी होटल खोल्ने निर्णयमा पुगेका हौं,’ उनले भने ।

असोज, कात्तिक मौसम खुल्ने बेला पनि हो । बिदाको समय पनि यही बेला पर्ने भएकाले पनि अरु बेला पर्यटक ओइरिन्थे । यद्यपि, कोभिड १९ महामारीपछि २ वर्षदेखि यो क्षेत्रका होटल शून्यप्राय छन् । सचिव गुरुङले सुरक्षित तरिकाले एबिसी घुम्न आउन सकिने बताए । सरकारी अनुमतिपछि अन्य क्षेत्र खुलिसक्दा पनि एबिसी क्षेत्र खुल्न ढिला भएकोमा उनले माफीसमेत मागेका छन् । कोभिड १९ को लक्षणसँग मिल्दाजुल्दा लक्षण देखिएमा आफैं सतर्क हुनसमेत उनको आग्रह छ ।