पोखरा, २९ भदौ

तनहुँ प्रमुख जिल्ला अधिकारी (प्रजिअ) सागर आचार्यको सरुवा गण्डकी प्रदेशको युवा तथा खेलकुद मन्त्रालयमा भएको छ । राजीव गुरुङ (दीपक मनाङे) लाई मन्त्री बनाउनकै लागि सामाजिक विकास मन्त्रालय फुटाएर युवा तथा खेलकुद मन्त्रालय बनाइएको थियो ।

मनाङे मन्त्री भएयता उनको मन्त्रालय पूरापुर हेर्ने गरी सचिवको व्यवस्था सरकारले गर्न सकेको थिएन । मंगलबार भने तनहुँका सिडिओ आचार्यलाई नेपाल सरकारले प्रदेशको युवा तथा खेलकुद मन्त्रालय सरुवा गरेको हो । सरकारले विपद् प्राधिकरणका सहसचिव विश्वप्रकाश अर्याललाई तनहुँ सरुवा गरेको छ ।

गण्डकी प्रदेशको वन तथा वातावरण मन्त्रालयका सचिव डा महेश्वर ढकालको संघीय वन तथा वातावरण मन्त्रालय सरुवा भएको छ । मुख्यमन्त्री तथा मन्त्रिपरिषदको कार्यालयकी सचिव इन्दु घिमिरेको संघीय सरकारको सूचना तथा सञ्चार मन्त्रालयमा सरुवा भएको छ ।

संघीय मामिला तथा सामान्य प्रशासन मन्त्रालयको समेत जिम्मेवारी सम्हालेका प्रधानमन्त्री शेरबहादुर देउवाले एकैपटक ८५ सहसचिवको सरुवा गर्ने निर्णय गरेका छन् । देउवाले मंगलबार मन्त्री स्तरको निर्णयबाट सहसचिवहरूको सरुवा तथा कामकाजमा खटाउने निर्णय गरेका हुन् ।