काठमाडौं । नेकपा एमालेका केन्द्रीय सदस्य भानुभक्त जोशी नेकपा एकीकृत समाजवादीमा प्रवेश गरेका छन्। राजधानीको बानेश्वरस्थित अर्पण पार्टी प्यालेसमा बिहीबार एक कार्यक्रमबीच उनी एकीकृत समाजवादीमा प्रवेश गरेका हुन्। उनलाई एकीकृत समाजवादीका अध्यक्ष माधवकुमार नेपालसहित शीर्ष नेताहरुले पार्टीमा स्वागत गरेका छन्।

सर्वोच्चले नेकपा (नेकपा) को दल दर्ता खारेज गरेपछि एमाले र माओवादी केन्द्र छुट्टिँदा नेता जोशी माधवकुमार नेपाल पक्षमा थिए। नेता नेपालले छुट्टै एकीकृत समाजवादी दल दर्ता गरेपछि उनी एमालेमै फर्किएका थिए। सुदूर पश्चिमका थोरै प्रभावशाली एमाले नेताहरुमध्ये जोशी पनि एक हुन्। छुट्टै दल खोलिएपछि सुदूर पश्चिममा एकीकृत समाजवादी एमालेभन्दा बलियो देखिएको थियो। नेता जोशीको प्रवेशसँगै एकीकृत समाजवादी झन् शक्तिमा आएको आँकलन गरिएको छ।

एमाले नीति, सिद्धान्तबाट विचलित भएकाले आफूले एकीकृत समाजवादीमा आबद्ध हुने निर्णय लिएको उनले बताए । जोशीले अघि भने, ‘म इमानदारीपूर्वक र क्षमताले भ्याएसम्म पार्टी काममा आजकै दिनबाट लाग्ने छु ।’

जोशीलाई एकीकृत समाजवादीले स्थायी कमिटी सदस्यको जिम्मेवारी दिएको छ। कार्यक्रममा अध्यक्ष नेपालले जोशीलाई स्थायी कमिटी सदस्य बनाएको घोषणा गरेका थिए।