काठमाडाैं ।

सरकार बनेको करिब तीन महिनापछि आज मन्त्रिपरिषद्ले पूर्णता पाउने सम्भावना छ । यद्यपी गठबन्धनका २ जना कांग्रेस र जनता समाजवादी पार्टीले अझै मन्त्री बनाउनेहरुकाे नाम टुङ्ग्याउन सकेका छैनन् ।

२९ असारमा सरकारको नेतृत्व सम्हालेका प्रधानमन्त्री शेरबहादुर देउवाले यसअघि किस्ता किस्तामा गरी पाँच मन्त्री र एक राज्यमन्त्री बनाएका थिए । २५ सदस्यीय मन्त्रिमण्डलमा प्रधानमन्त्री देउवाले पाँच जनाको भर सरकार चलाएका छन् ।

बिहीबार बालुवाटारमा बसेको सत्तारुढ गठबन्धनका शीर्ष नेताहरुको बैठकमा आज मन्त्रिपरिषदलाई पूर्णता दिने सहमति भएकाे छ । मन्त्रालय बाँडफाँडको टुंगो लगाएसँगै आज मन्त्रिपरिषदलाई पूर्णता दिइन लागिएको हाे । सहमतिअनुसार नेपाली काँग्रेसले ८ मन्त्री र दुई राज्यमन्त्री पाउने भएको छ । माओवादी केन्द्रले ५ मन्त्री र एक राज्यमन्त्री पाउने भएको छ । त्यस्तै, नेकपा (एकीकृत समाजवादी) र जनता समाजवादी पार्टी (जसपा) ले ४–४ मन्त्रालय पाएका छन् ।

माओवादीले यसअघि नै मन्त्री बन्नेहरुकाे नाम टुङ्ग्याएकाे छ भने नेकपा एसले पनि बिराेध खतिवडा, प्रेम आले, रामकुमारी झाक्री र किसान श्रेष्ठलाई मन्त्री बनाउने गरी पार्टीम प्रस्ताव लैजादै छ ।

कांग्रेसमा मन्त्री छनाैट गर्न प्रधानमन्त्री देउवाले एक पटक पदाधिकारी बैठक राखेपनि सहमति हसन सकेन भने जसपाले केन्द्रीय हाइकमाण्डलाई छनाैट गर्ने जिम्मा दिएकाे छ । यी दलले आजै मन्त्रिमण्डलमा सहभागी गराउनेहरुकाे नाम छनाैट गर्न बैठक बस्दैछन् ।