पोखरा ।
नेपाल फिजिकल ट्रेनिङ एसोसियसन क्षेत्रीय समिति पोखराको आयोजनामा दसैं, तिहार, छठ पर्व तथा नेपाल संवतको अवसरमा शुभकामना आदानप्रदान कार्यक्रम गरिएको छ । एसोसियसन केन्द्रका अध्यक्ष मीनबहादुर गुरुङले एसोसियसनले कोरोना महामारीका कारण विभिन्न सामाजिक काम गर्न नसकेको जनाउँदै महामारी साम्य हुदै गए संस्थाले आगामी कार्ययोजनाअघि बढाउने बताए । उनले सबै सदस्यलाई सजकताका साथ चाडपर्व मनाउन आग्रह गरे ।

समितिका संरक्षक याम गुरुङले संस्थाको हकहितका लागि सोच्न आग्रह गरे । समिति पोखरा क्षेत्र अध्यक्ष गजबहादुर गुरुङले समितिमा आवद्ध रहेर ट्रेनिङमा सहभागिता जनाएका प्रशिक्षार्थी कोही कसैलाई पनि कोरोनाले छुन नसकेको दाबी गरे ।
कार्यक्रममा क्षेत्रीय समिति धरान, काठमाण्डौ, बुटवल, दाङका प्रतिनिधिको सहभागिता थियो । कार्यक्रममा समितिका महासचिव केहरसिंङ गुरुङ र सचिव जितबहादुर गुरुङले पनि बोलेका थिए ।