पर्यटन

हिमपातका कारण याकखर्कमा अलपत्र ४ विदेशी पर्यटकको उद्दार

मुस्ताङ र डोल्पाको सीमानामा बाक्लो हिमपात परेका कारण बाटो पहिल्याउन नसक्दा अलपत्र

सुन्दरकुमार थकाली २०७८ कार्तिक ७ गते ११:५७

जोमसोम—हिमाली जिल्ला मुस्ताङ र डोल्पाको सीमावर्तीक्षेत्र याकखर्कमा कार्तिक ४ गतेदेखि दुई दिनसम्म अलपत्र परेका विदेशी पर्यटकको शनिबार प्रहरीको रोहबरमा उद्दार गरिएको छ ।उनीहरुको कैलाश एअरको हेलिकोप्टरबाट उद्दार गरिएको जिल्ला प्रहरी कार्यालय मुस्ताङले जनाएको छ ।
कार्तिक ४ गतेका दिन मुस्ताङ र डोल्पाको सीमानामा बाक्लो हिमपात परेका कारण जर्मनका दुई पुरुष ,दुई महिला र २ जना नेपाली पथप्रर्दशक गाईड अलपत्र परेका थिए । समून्द्री सतहदेखि ५ हजार ३ सय मिटर अग्लो उचाईको अग्लो पहाड क्रस गरेर मुस्ताङ आउने क्रममा पदमार्ग पहिल्याउन नसक्दा उनीहरु बीच बाटोमै अलपत्र परेको जिल्ला प्रहरी कार्यालय मुस्ताङका सूचना अधिकारी प्रहरी निरीक्षक प्रताप पौडेलले जानकारी दिए ।

उनका अनुसार याकखर्कमा पर्यटक अलपत्र परिरहेको सूचना स्थानीयबासीबाट प्रहरीलाई खबर प्राप्त भएपछि बिदेशी पर्यटकसहित पर्यटक गाईडको समेत हेलि मार्फत जोमसोम ल्याएर उद्दार गरिएको हो । यसअघि अपलपत्र परेका विदेशी पर्यटकले नेपाल स्थित जर्मन दुताबासमा आफुहरु पदमार्गमा अलपत्र परेको सूचना जानकारी गराएको प्रहरी निरीक्षक पौडेलको भनाई छ ।

उद्दारपछि जोमसोम विमानस्थलमा सामुहिक फोटो खिचाउदै विदेशी पर्यटक

डोल्पाबाट मुस्ताङको मुक्तिनाथ हुदै पदमार्ग गरेर फर्किने योजनासहित गत असोज १७ गते डोल्पाको दुनैबाट पदयात्रामा हिडेका उनीहरुले आवश्यक बन्दोबस्तीका सामान करिव ७÷८ वटा घोडामा बोकाएर ल्याएका थिए ।पर्यटक मुस्ताङ र डोल्पाको सीमानाकामा हराएको २ दिपछि मात्र सम्पर्कमा आएका थिए । उनीहरुलाई कैशाल एअरको हेलिकोप्टरले ४ टिप गरेर जोमसोम ल्याई पू¥याएको प्रहरी निरीक्षक पौडेलले उल्लेख गरे ।

उनका अनुसार दुनैबाट सामान बोकाएर ल्याईएका घोडाहरु सो स्थानबाट पुनः दुनै फिर्ता पठाईएको थियो । भारी हिमपातका कारण अलपत्र परेका विदेशी पर्यटकको टोली शनिबारनै मुक्तिनाथ पुगेर पदयात्रामा निस्किएको जनाईएको छ ।

सुन्दरकुमार थकाली

थकाली समाधान दैनिकका मुस्ताङ संवाददाता हुन्  

तपाईको प्रतिक्रिया