पोखरा

प्रहरी प्रधान कार्यालयले स्याङ्जा र तनहुँ जिल्ला प्रहरी कार्यालयका प्रमुखको सुरुवा गरेको छ । प्रहरी महानिरीक्षक शैलेन्द्र थापा क्षेत्रीले शनिबार २२ एसपीको सरूवा गरेका हुन् । त्यसक्रममा स्याङ्जा र तनहुँका प्रहरी प्रमुख पनि परेका छन् ।

स्याङ्जाका प्रहरी प्रमुख एसपी होबिन्द्र बोगटीको प्रहरी प्रधान कार्यालयको कानुन शाखामा सरुवा भएको छ । उक्त शाखामा वसन्त रजौरे थिए । रजौरेको जिल्ला प्रहरी कार्यालय धनुषा सरुवा भएको छ । धनुषाका एसपी प्रकाश रानाभाट प्रदेश प्रहरी कार्यालय गण्डकीमा सरुवा भएका छन् ।

तनहुँका प्रहरी प्रमुख एसपी दिनेशराज मैनालीको महानगरीय प्रहरी परिसर काठमाडौंमा सरुवा भएको छ । रमेशकुमार बस्नेतका ठाउँमा मैनालीको सरुवा भएको हो । बस्नेतको जिल्ला प्रहरी कार्यालय पर्सा सरुवा भएको छ । पर्सा प्रहरी प्रमुख बेलबहादुर पाण्डे प्रहरी प्रधान कार्यालयको कार्यविभाग, सुरक्षा सेवा व्यवस्थापन महाशाखा सरुवा भएका छन् ।

एसपीको सरुवा र हेरफेरका क्रममा स्याङ्जामा एसपी राजीवबहादुर बस्नेतलाई जिम्मेवारी दिइएको छ । उनी प्रदेश प्रहरी कार्यालय पोखरामा थिए । तनहुँ प्रहरी प्रमुखको जिम्मेवारी एसपी राजेन्द्रबाबु रेग्मीले पाएका छन् । उनी नेपाल प्रहरीको प्रदेश सशस्त्र प्रहरी गण मुख्यालय धनगढीमा थिए । धनगढीअघि भने नेपाल प्रहरीकै संघीय प्रहरी कार्यालय पोखरामा थिए । उनी स्याङ्जाका हुन् ।

प्रधान कार्यालयको मानव बेचबिखन अनुसन्धान ब्युरोमा कार्यरत अनुरागकुमार द्विवेदीलाई सुदूरपश्चिम सशस्त्र प्रहरी गणमा सरूवा गरिएको छ । अविनारायण काफ्ले अख्तियारबाट जिल्ला प्रहरी कार्यालय सप्तरीमा, कृष्ण प्रसाईं २ नम्बर प्रदेश प्रहरी कार्यालय जनकपुरबाट जिल्ला प्रहरी सर्लाही, टीकाबहादुर केसी काठमाडौं उपत्यका प्रहरी कार्यालय अन्वेषण योजना तथा विकास शाखाबाट लुम्बिनी प्रदेश सशस्त्र प्रहरी गण मुख्यालय सरूवा भएका छन् । मकवानपुरमा कार्यरत सोमेन्द्र सिंह राठोरलाई युएन जगेडा कोषमा सरूवा गरिएको छ ।