पोखरा ।

पोखरा महानगरपालिका वडा नम्बर २१ का अध्यक्ष खगराज आचार्य विपन्न परिवारको समस्या सम्बोधन गर्ने उद्देश्यका साथ जनता माझ पुगेका छन् । मंसिर १५ देखि आचार्यले विपन्न परिवारसँग प्रत्यक्ष भेटी शिक्षालाई प्राथमिकताका साथ हेरेका छन् ।

आफ्नो वडाको मट्टिखान, फुस्रेखोला, चुरोटे, शिवालय र डुवार पुगी विपन्न परिवरसँग भेटी समस्या पहिचान गरिसकेको आचार्यले सुनाए । सोमबार र मंगलबार लेवाड र मैदान पुग्ने आचार्यले बताए ।

‘कोभिड महामारीमा वास्तविक पीडकले राहत नपाएर धनीमानीले राहत लगे भन्ने खबरले पनि चर्चा पाएको थियो,’ वडाध्यक्ष आचार्यले भने, ‘सो प्रवृत्ति फेरि नछाओस् भनेर म प्रत्यक्ष विपन्न परिवारलाई भेट्न आएको हुँ ।’

मंगलबारसम्म सम्पूर्णको विपन्न परिवारको पहिचान गरिसक्ने जानकारी आचार्यले दिए । ‘हामी पुन वडाको बैठक बस्छौं र कार्यक्रमबीच विपन्नहरुलाई छात्रवृत्ति, कापीकलम, कपडा वितरण गर्नेछौं । पाँच हजारका दरले विपन्न परिवारलाई प्रदान गर्नेछौं,’ वडाअध्यक्ष आचार्यले भने ।