पोखरा ।

नेपाली कांग्रेस कास्कीका सचिव भानु ढकालले आफ्नो जन्मदिन मानव सेवा आश्रममा मनाएका छन् । पोखरा महानगरपालिका वडा नं. १७ छोरेपाटनस्थित आश्रम पुगेर आश्रममा रहेका अग्रज व्यक्तित्वहरुसंग आशिर्वाद लिएर उनले जन्मदिन मनाएका हुन् ।

आश्रममा रहेका ज्येष्ठ नागरिकहरुले नेता ढकाललाई सधैं सकारात्मक सोंचका साथ अघि बढ्न आग्रह गर्दै आफूले चालेका पाइलाहरुले सफलताको शिखर चुम्न सकून् भन्ने आशिर्वाद दिएका थिए । उक्त अवसरमा सचिव ढकालले खाद्यान्न सहयोग पनि गरेका छन् । ढकालले आश्रमका पोखरा शाखा प्रमुख राजन सापकोटालाई खाद्यान्न हस्तान्तरण गरेका थिए ।

उक्त अवसरमा प्रमुख सापकोटाले आश्रममा आएर जन्मदिन मनाएकोमा नेता ढकाललाई धन्यवाद दिए । उनले आश्रममा राजनीतिक दलका नेताहरुको ध्यान पुग्न नसकिरहेको अवस्थामा कांग्रेस नेता ढकाल आउनु आफैमा गौरवको कुरा भएको बताए । सबै राजनीतिक दल र तिनका नेताहरुमा ढकालको जस्तै सकारात्मक सोंच आउने हो समाज परिवर्तन धेरै टाढा नरहेको उनले स्पष्ट पारे ।

नेता ढकालले आफू सहयोग गर्न भन्दा पनि आशिर्वाद लिन आश्रम आएको बताए । उनले आगामी दिन आवश्यक परेको सहयोग गर्न र आश्रममा आश्रित बाबा-आमाका लागि के कस्तो सहयोग चाहिन्छ त्यसका लागि पहल गर्ने प्रतिवद्धता जनाए । उनले बाबा-आमाहरुलाई आश्रम र वृद्धाश्रममा पुर्याउने अवस्था अन्त्य हुनुपर्नेमा जोड दिंदै यसमा राज्यको पनि ध्यान पुग्न आवश्यक रहेको बताए । नेता ढकालकाृ साथमा श्रीमती आरती गौतम ढकाल, दिदी पर्मिला बराल र छोरा विधान ढकाल पनि आश्रम पुगेका थिए ।