कमला शर्मा कँडेल (विनिता)
अध्यक्ष, पोखरा लेडी जेसीज

नेपालकै सुन्दर र पर्यटकीय नगरमा आजबाट नेपाल जेसीजको राष्ट्रिय महाधिवेशन सुरु हुँदै छ । नेपालकै ठूलो महानगरमा हुन लागेको नेपाल जेसीजको ४८ औं महाधिवेशन जेसीजमा आवद्धहरुका लागि ठूलो उत्सव र अवसर हो ।

जेसीजमा आवद्ध नभएका र सर्वसाधारणका लागिसमेत यो ठूलो अवसर हो । पोखरा जेसीजको आतिथ्यतामा ४ गतेसम्म पोखराको नयाँबजारस्थित पोखरा प्रदर्शनी केन्द्रमा चल्ने महोत्सवमा करिब ४ हजार युवाको जमघट हुँदै छ । व्यक्तित्व र नेतृत्व विकास गरी सक्रिय युवाको जमघटले मात्र पोखरा हुँदैन, यो महाधिवेशनले नयाँ नेतृत्वसमेत छान्नेछ । यो महाधिवेशनबाट पोखरा र समग्र देशबासीले नै जेसीजले के गरिरहेको छ भन्नेसमेत थाहा पाउनुहुनेछ ।

महाधिवेशनमा नेपालका १सय६१ शाखाका अध्यक्ष तथा प्रतिनिधि गरी १ हजार ३सय प्रतिनिधि तथा पर्यवेक्षकले भाग लिने छन् । कोभिड महामारीबाट थलिएको पोखराको पर्यटन क्षेत्रलाई प्रवद्र्धन गर्न यसले पक्कै सघाउनेछ । महाधिवेशनका सहभागीलाई पोखराका पर्यटकीय स्थलहरुको भ्रमण, अवलोकन गराउने कार्यक्रमसमेत छ ।

पोखरा जेसीज हाम्रो मातृसंस्था हो । यही अग्रज संस्थाको अभिभावकत्वमा पोखरा लेडी जेसीज सन् १९८९ मा स्थापना भएको हो । हामी हाम्रा सदस्यलाई विभिन्न खालका तालिम दिएर व्यक्तित्व विकास गराउँछौं । व्यक्तित्व विकाससँगसँगै नेतृत्व विकास गर्न पनि सघाउँछौं । व्यक्तित्व र नेतृत्व विकास भएपछि समाजका सबैजसो क्षेत्रलाई चाहिने सक्षम र क्षमतावान् नागरिक तयार हुन्छन् । म नेपाल जेसीजको राष्ट्रिय महाधिवेशनलाई सफल बनाउन सबैलाई हार्दिक अनुरोध गर्दछु ।