देशभरिका विद्यालयहरु माघ १५ गतेसम्म बन्द गर्ने निर्णय

समाधान संवाददाता २०७८ पुष २५ गते १८:५२

Advertisement

काठमाडौ ।

कोरोना भाइरसको संक्रमण बढ्दै गएपछि सरकारले देशभरका विद्यालय माघ १५ गतेसम्म बन्द गर्ने भएको छ। अहिले दिइएको हिउँदे बिदालाई नै माघ १५ सम्म लम्ब्याउने निर्णय कोभिड १९ संकट व्यवस्थापन केन्द्र (सिसिएमसी)को बैठकले गरेको हो।

Advertisement

सिसिएमसीकी प्रवक्ता सुनीता नेपालले आइतबार बसेको बैठकले हिउँदे बिदा माघ १५ गतेसम्म लम्ब्याउने निर्णय गरेको जानकारी दिइन्।

उनले निर्णय कार्यान्वयनका लागि सम्बन्धित मन्त्रालयहरुमा सिफारिस गरिसकिएको जानकारी पनि दिइन्।

बैठकले जिल्लामा संक्रमणको अवस्था हेरेर सम्बन्धित प्रजिअले स्मार्ट लकडाउन जारी गर्न सक्ने निर्णय गरेको पनि प्रवक्ता नेपालले बताइन्।

अर्को सूचना जारी नभएसम्म सार्वजनिक स्थानमा २५ जनाभन्दा बढी भेला हुने गरी मेला महोत्सव नगराउने गरी भीड रोक्नसमेत गृह मन्त्रालयलाई सिफारिस गर्ने निर्णय भएको समेत प्रवक्ता नेपालले जनाइन् ।

माघ ३ गतेदेखि सार्वजनिक स्थानहरु पार्क, फिल्म हल, रेष्टुरेन्ट र सपिङको लागि मलमा जाने व्यक्तिले अनिवार्य खोप कार्ड देखाउनुपर्ने भएको छ । सीमानाकामा कोभिड परीक्षणलाई व्यापक तुल्याउने, खोप लगाउन छुटेका बालबालिकालाई खोपको दायरामा ल्याउने निर्णय पनि बैठकले गरेको छ ।

भीडभाड हुने सार्वजनिक स्थलमा एन्टीजेन बुथ राख्ने निर्णय पनि सीसीएमसी बैठकले गरेको छ । साथै, बैठकले राजनीतिक कार्यक्रम र मेला महोत्सव नगर्न समेत आग्रह गरेको छ । गर्नेपरे स्थानिय प्रशासनको अनुमति पनि आवश्यक पर्ने भएको छ ।

तपाईको प्रतिक्रिया