पोखरा ।

र्‍याप गायक आशीष राना ‘लाउरे’ लाई ११ दिन हिरासतमा राखेर अनुसन्धान गर्न कास्की प्रहरीलाई जिल्ला अदालत कास्कीले अनुमति दिएको छ । ब्राउन सुगर कारोबार गर्ने समूहसहित लाउरे पक्राउ परेका थिए । यसअघि लाउरेलाई पहिलो पटक ८ दिन र दोस्रा ेपटक १७ दिनका लागि म्याद थप गरिएको थियो ।

लाउरेसहित ४ जनालाई कास्की प्रहरीले न्युरोडबाट पुस १४ गते पक्रेको थियो । प्रहरीले करिब १३ ग्राम ब्राउन सुगरसहित लाउरे र अरु ३ जनालाई पक्राउ गरेको थियो । पक्राउ पर्नेहरुमा पोखरा महानगरपालिका वडा नम्बर २१ घर भएका ३९ वर्षीय ध्रुव थापा, रुपा गाउँपालिका वडा नम्बर ७ घर भएका बिक्की भन्ने ३० वर्षीय नवीनकुमार गुरुङ र पोखरा महानगरपालिका वडा नम्बर ८ सभागृह बस्ने २२ वर्षीय सुस्मिता गुरुङ छन् । सुस्मिताको स्थायी ठेगाना स्याङ्जाको भीरकोट नगरपालिका हो । उनीहरुबाट डिजिटल तराजु १ थान, नगद ३८ हजार ३५० रुपैयाँ, मोबाइल सेट ५ थान स्कुटर १ थान बरामद भएको थियो ।

लाउरे चर्चित नेपाली टिभी रियालिटी सो हिमालय रोडिजका जज पनि हुन् । लागुऔषध कसुरमा प्रहरीले ९० दिनसम्म हिरासतमा राखेर अनुसन्धान गर्न सक्ने कानुनी प्रावधान छ । लाहुरे लागुऔषध सेवनकर्तामात्र रहेको प्रहरीको प्रारम्भिक निष्कर्ष छ ।

अरु लागु औषधको दाँजोमा ब्राउन सुगर वा कोकिनमा कडा सजायको व्यवस्था छ । २५ ग्रामभन्दा कम भेटिएको अवस्थामा ५ देखि १० वर्षसम्म जेल सजाय हुन सक्छ । अफिम, कोका वा सोबाट बनेको लागुऔषधको सेवन गर्नेको हकमा १ वर्षसम्म कैद वा १० हजार रुपैयाँसम्म जरिवाना हुन सक्छ । लागु औषध मुद्दामा कैद छुटको कानुनी प्रावधान छैन ।

लागुपदार्थ दुव्र्यसनको कुलत पोखरामा ठूलो समस्याका रुपमा छ । गएको शुक्रबार जिल्ला प्रहरी कार्यालय कास्कीभित्र नवनिर्मित ४ भवनको उद्घाटन समारोहमा एसपी रमेश थापाले बताए अनुसार हिरासतमा रहेकामध्ये ९० प्रतिशत लागुपदार्थ दुव्र्यसनका अभियुक्त छन् ।