हिउँ खेल्न गएका २ किशोर १० दिनपछि मृत फेला

समाधान संवाददाता २०७८ फागुन २ गते १२:०२


गोरखा

Advertisement


हिउँ खेल्न गएका २ किशोर १० दिनपछि मृत भेटिएका छन् । माघ २० गतेदेखि हराएका बारपाक गाउँका १६ वर्षका करण घले र १६ वर्षकै साइँला घले मृत भेटिएका हुन् ।


माघको १९ गते अलिअलि मात्र हिउँ परेको थियो । उनीहरु २० गते हिउँ खेल्न गएका थिए । त्यो दिन बाक्लो हिउँ परेपछि उनीहरु फर्कन सकेका थिएनन । बारपाकबाट प्राय धार्चेडाँडातिर हिउँ खेल्न जाने चलन छ ।

Advertisement


उनीहरु पहिलोपल्ट धार्चे गएको हुँदा हिउँभित्र फँसेर हराएको हुनसक्ने अनुमान थियो । किशोरहरु सम्पर्क विहीन भएको घटनाका बारेमा आफन्तले प्रहरीलाई २३ गते मात्र जानकारी गराएका थिए । स्थानीयबासी र प्रहरीको संयुक्त खोजी टोलीले आइतबार शव फेला पारेको हो ।


जिल्ला प्रहरी कार्यालय गोरखाका प्रहरी नायब उपरीक्षक (डिएसपी) प्रकाश दाहालका अनुसार उनीहरूको शव धार्चे गाउँपालिका–१ कुन्द्रामा खोंचमा भेटिएको हो । हिउँले पुरिएर हराइरहेको र अहिले हिउँ पग्लिँदै गएर शव देखा परेको हो । घरमा र बाटोमा साथीहरूलाई भेट्दासमेत उनीहरूले लाप्राक हिउँ खेल्न जाने भनेर भनेको र फोनको लोकेसन पनि सोही स्थानमा देखाएको आधारमा प्रहरीले उनीहरूको खोजी गरेको थियो ।

तपाईको प्रतिक्रिया