पोखरा ।

अधिवक्ता कमल अर्याललाई ठगी आरोपमा पक्राउ गरिएकोमा नेपाल बार एसोसिएसन कास्कीले दुख व्यक्त गरेको छ । आफूलाई ठगी गरेको भन्ने पक्षको आरोपको उजुरीपछि अर्याल फागुन ३ गते पक्राउ परेका थिए ।

अर्याल बिहीबार रिहा भइसकेका छन् । पक्षसँगको मिलापत्रपछि उनको रिहाइ भएको हो । कास्की जिल्ला अदालत बार एसोसिएसनका अध्यक्ष नारायण शर्मा र सचिव युवराज पराजुलीले जारी गरेको विज्ञप्तिमा अर्याललाई पक्रिएको घटनाप्रति दुख व्यक्त गरिएको छ ।

घान्द्रुकका रामबहादुर परियारको भैंसी हराएको सम्बन्धी मुद्दा जिल्ला अदालतमा परेको थियो । त्यसमा अधिवक्ता अर्यालले कानुन व्यवसायी सेवा दिएका थिए । मुद्दाको फैसला परियारको विपक्षमा आएको थियो । मुद्दा जिताइदिएको भनेर त्यसबापत पैसा असुलेको तर फैसलाको पूर्णपाठ आउँदा हारेको आएको भन्दै परियारले अर्याल विरुद्ध ठगीको उजुरी गरेका थिए । उजुरीका आधारमा अदालतको अनुमति लिएर प्रहरीले अर्याललाई पक्रेको थियो ।