पोखरा ।

अवैध लागु औषध ब्राउन सुगर उपभोग गरेको अभियोग लागेका र्‍यापर लाहुरे ५० हजार धरौटीमा छुटेका छन् । कास्की जिल्ला अदालतमा थुनछेक बहसपछि उनी मंगलबार रिहा भएका हुन् । उनी पुस १४ गते पक्राउ परेका थिए । उनले प्रहरी हिरासतमा ३६ दिन बिताएका छन् ।

लाहुरेसँगै पक्राउ परेका अरु ३ जना भने पुर्पक्षका लागि जेल चलान भएका छन् । ध्रुव थापा, नवीन गुरुङ र सुस्मिता गुरुङलाई थप अनुसन्धानका लागि थुन्ने आदेश अदालतले गरेको अदालतका सूचना अधिकारी नील पनेरुले जानकारी दिए ।

लाउरेसहित ४ जनालाई कास्की प्रहरीले न्युरोडबाट पुस १४ गते पक्रेको थियो । प्रहरीले करिब १३ ग्राम ब्राउन सुगरसहित लाउरे र अरु ३ जनालाई पक्राउ गरेको थियो । पक्राउ पर्नेहरुमा पोखरा महानगरपालिका वडा नम्बर २१ घर भएका ३९ वर्षीय ध्रुव थापा, रुपा गाउँपालिका वडा नम्बर ७ घर भएका बिक्की भन्ने ३० वर्षीय नवीनकुमार गुरुङ र पोखरा महानगरपालिका वडा नम्बर ८ सभागृह बस्ने २२ वर्षीय सुस्मिता गुरुङ छन् । सुस्मिताको स्थायी ठेगाना स्याङ्जाको भीरकोट नगरपालिका हो । उनीहरुबाट डिजिटल तराजु १ थान, नगद ३८ हजार ३५० रुपैयाँ, मोबाइल सेट ५ थान स्कुटर १ थान बरामद भएको थियो ।

लाउरे चर्चित नेपाली टिभी रियालिटी सो हिमालय रोडिजका जज पनि हुन् ।लाहुरे लागुऔषध सेवनकर्तामात्र रहेको प्रहरीको प्रारम्भिक निष्कर्ष थियो ।