समाधान संवाददाता

पोखरा ।

नेकपा (एकीकृत समाजवादी)का पोलिटब्युरो सदस्य तथा गण्डकी प्रदेशका उपाध्यक्ष श्रीनाथ बरालले पोखरा महानगरपालिकाको मेयरमा आकांक्ष राखेका छन् । स्थानीय चुनाव नजिकिँदै गर्दा उनी मेयरका लागि बलियो दाबेदारका रुपमा प्रस्तुत भएका छन् ।

माधव नेपाल नेतृत्वको पार्टीबाट कास्की अध्यक्ष धनराज आचार्य मेयरका अर्का आकांक्षी छन् । नेकपा एस अहिले कांग्रेस नेतृत्वको सत्ता गठबन्धनमा सामेल छ । देशका ६ वटा महानगरपालिकामध्ये नेकपा एसले एउटाको प्रमुख पाउँदा पोखरा उसको भागमा पर्ने दाबी सो पार्टीको छ । सो पार्टीबाट मेयरमा आचार्यले दाबेदारी प्रस्तुत गर्दा बरालसमेत आकांक्षी बनेका हु् ।
जिल्ला विकास समिति कास्कीको अन्तिम कार्यकालमा उपसभापति रहेका बरालले २०३६ सालमा कम्युनिस्ट पार्टीको सदस्यता लिएका हुन् । २०४१ सालदेखि पूर्णकालीन कार्यकर्ता बनेका बराल २०४६ सालको जनआन्दोलनमा गण्डकी अञ्चलमा बाममोर्चाका सदस्य थिए । उनी सामाजिक, शैक्षिकका अलवा विकास निर्माणको क्षेत्रमा सक्रियतापूर्वक लागेका छन् ।

२०४४ सालमा पञ्चायत कालका कार्यकर्ताले साथीहरुलाई अपहरण गरेको विरुद्धमा पृथ्वीनारायण क्याम्पसमा १३ दिन आमरण अनसन बसेका बराल पञ्चायत कालमा नजरबन्दमा परेका थिए । २०५९ माघ १९ को शाही घोषणा तथा तत्कालीन राजा ज्ञानेन्द्रले गरेको स्थानीय निर्वाचन बहिस्कार आन्दोलनको क्रममा गिरफ्तारीमा परेका बराल नेकपाको कार्यकालमा केन्द्रीय सदस्य तथा कास्की सहईन्चार्ज थिए ।

२०७४ सालको स्थानीय निर्वाचनमा पोखरा महानगरपालिकामा १ लाख २५ हजार ९ सय ३२ मत खसेको थियो । जुन कुल मतदाताको ७४ दशमलव ९३ प्रतिशत हो । २०७४ मा पोखरामा १ लाख ६८ हजार, ६७ मतदाता थिए । २०७४ सालको स्थानीय निर्वाचन बेलाको भन्दा अहिले पोखरामा ३९ हजार ६ सय ३८ जना मतदाता बढेका छन् । निर्वाचन कार्यालय पोखराका अनुसार पोखरा महानगरमा २ लाख ७ हजार ५ जना मतदाता पुगेका छन् ।