जोमसोम—
कोरोना कहरले थलिएको मुस्ताङको पर्यटनक्षेत्रले विस्तारै गति लिन थालेको छ ।कोरोना भाईरस न्यूनिकरण हुँदै गईरहेको र हिउँदयाम सकिएर गर्मीयाम सुरु भएसंगै मुस्ताङमा पर्यटक आगमन वृद्धि हुन थालेको हो ।
कोरोनाले ठप्प भएको पोखरा—जोमसोम हवाई सेवा गत फागुन १७ गतेदेखि सञ्चालनमा आएको थियो ।सुरुआती चरणमा एकाध उडान मात्रै भर्दै आईरहेका निजी एअरलाईन्स कम्पनीले पर्यटक ओसार्न भ्याई÷नभ्याई भएको छ ।पोखरा—जोमसोम नियमित हवाई उडानसंगै शनिबार १५ वटा उडान भएको जोमसोम स्थित तारा एअरलाईन्सका जोमसोम स्थित प्रतिनिधि सुजन लालचनले जानकारी दिए । उनका अनुसार शनिबार तारा एअरले ५ उडान र सुमित एअरको दुई वटा जहाजले १० वटा उडान गरेको हो ।

यस्तै,शुक्रबार मात्रै ताराले ५ उडान र सुमित एअरले ४ उडान भरेकोमा एकैदिन ६ उडान वृद्धि भएको उनले जानकारी दिए । आईतबार हवाई सेवा मार्फत भारतीय तथा तेश्रो मुलुकका गरी करिव ३ सय बढी विदेशी पर्यटक मुस्ताङ भित्रिएको तारा एअरका मुस्ताङ प्रतिनिधि लालचनको भनाई छ । उनले कोरोना प्रभाव साम्य हुँदै गईरहेकाले पोखरा—जोमसोम उडान थप वृद्धि हुनसक्ने अनुमान गरे ।