कास्की एफएनजे फुटसलको सेमीमा

समाधान संवाददाता २०७८ चैत २९ गते १४:१८

काठमाडौं l
पत्रकार महासंघको ६७ औं स्थापना दिवसको अवसरमा आयोजित प्रथम मिडिया कप फुटसल प्रतियोगिताको सेमिफाइनल समीकरण पूरा भएको छ । ललितपुरको नेसनल स्र्पोट्स सेन्टरमा आयोजित प्रतियोगिताको अन्तिम ४ मा प्रवेश पाउने टोलीमा न्युज २४ टेलिभिजन, टिम शिलापत्र, पत्रकार महासंघ कास्की शाखा र पत्रकार महासंघ ललितपुर शाखा छन् ।


पहिलो क्वार्टरफाइनलमा न्युज २४ ले नेपाल खेलकुद पत्रकार मञ्चलाई ५–३ गोल अन्तरले हरायो । त्यस्तै, टिम शिलापत्रले दोस्रो क्वार्टरफाइनलमा फोटो जर्नलिस्ट क्लबलाई ४–३ ले पराजित गर्‍याे। पत्रकार महासंघ कास्की शाखाले नेपाल चलचित्र पत्रकार संघलाई २ का विरुद्ध १० गोलले हरायो ।


सो खेलमा कास्कीका पूर्ण न्यौपाने एक्लैले ५ गोल गरे । प्रतियोगिताको अन्तिम क्वाटरफाइनलमा महासंघको ललितपुर शाखाले नयाँ पत्रिका दैनिकलाई ४–१ ले पाखा लगायो । सो खेलमा परिवेश पोखरेलले ललितपुरका लागि ४ गोल गरेका थिए । पहिलो सेमिफाइनलमा मंगलबार न्युज २४ र कास्की तथा दोस्रोमा टिम शिलापत्र र ललितपुरबीच प्रतिस्पर्धा हुनेछ ।


प्रतियोगिताको उद्घाटन पत्रकार महासंघका केन्द्रीय अध्यक्ष विपुल पोखरेलले रेफ्रीलाई बल हस्तान्तरण गरी गरे । उद्घाटन खेलमा नेपाल खेलदकुद पत्रकार मञ्चले हाम्रो सञ्चार डट कमलाई ५–३ ले हराएको थियो । त्यस्तै न्युज २४ ले ईकागजलाई १६–० को अन्तरमा हरायो । सो खेलमा न्युज २४ का सुरज महर्जन एक्लैले ७ गोल गरे । ग्यालेक्सी फोरके टेलिभिजन अनुपस्थित भएपछि पिजे क्लवले बाइ पाएर सिधै क्वार्टरफाइनल प्रवेश गरेको थियो ।


चौथो खेलमा टिम शिलापत्रले महासंघको काठमाडौं शाखालाई ६–४ ले हराएको थियो । अनलाइन खबर अनुपस्थित भएपछि महासंघको कास्की शाखाले बाइ पायो । चलचित्र पत्रकार संघले नेपाल टेलिभिजनमाथि ६–२ गोल अन्तरको जित निकाल्यो । महासंघको ललितपुर शाखाले प्रेस चौतारी रुपन्देहीलाई ६–० ले हरायो । प्रि–क्वार्टरफाइनलको अन्तिम खेलमा नयाँ पत्रिकाले पत्रकार महासंघ सिन्धुपाल्चोक शाखालाई १–० ले हराएको थियो ।


बिमा समितिको मुख्य प्रायोजनमा आयोजित प्रतियोगितामा १६ टोलीको सहभागिता छ । नेपाल बैङ्क लिमिटेड, महालक्ष्मी बिकास बैंक र सिटिजन्स बैंकले प्रथम मिडिया कप फुटसललाई प्रायोजन गरेका छन् । नकआउटका आधारमा खेलाइएको प्रतियोगिताको विजेताले २५ हजार र उपविजेताले १५ हजार नगद प्राप्त गर्ने छन् । विधागततर्फ उत्कृष्ट हुने खेलाडीलाई पनि नगद पुरस्कार दिइने फुटसल प्रतियोगिताका संयोजक एवं पत्रकार महासंघका केन्द्रीय सचिव पवन आचार्यले जानकारी दिए ।

तपाईको प्रतिक्रिया