पोखरा ।

नेपाली कांग्रेस पोखरा महानगर समितिले पोखरा महानगरपालिकाको मेयर र उपमेयर उम्मेवार बन्न इच्छुकलाई पार्टी उम्मेदवारी दर्ता गराउन आह्वान गरेको छ । समितिको सचिवालयले शनिबार विज्ञप्ति जारी गर्दै उक्त आह्वान गरेको हो ।

वैशाख ४ गते ४ बजेभित्र कांग्रेस नगर कार्यसमितिको सचिवालयमा आकांक्षी आफै उपस्थित भई नाम दर्ता गर्नुपर्ने नगर कार्यसमिति सचिवालयले जानकारी दिएको छ । ‘नेपाली कांग्रेसको विधान २०१७ (संशोधनसहित) धारा ३० (१) तथा स्थानीय तह निर्वाचन ऐन २०७३ को दफा १२ गते योग्य ठहर गरेको नेपाली नागरिकले तोकिएको ढाँचामा उम्मेदवारी दर्ता गराउने सूचना प्रकाशन गरिएको छ,’ समितिले निकालेको सूचनामा उल्लेख छ ।

सत्तारुढ नेपाली कांग्रेस र सत्ताका अरु घटकहरुबीच पोखरासहित देशका ६ महानगरपालिकामा कुनकुनमा कुनकुन पार्टीका उम्मेदवार हुने भन्नेचाहिँ अहिलेसम्म तय भएको छैन । तर कांग्रेसले भने पोखरा महानगरपालिकाको मेयरमा आफ्नो उम्मेदवार हुनुपर्ने दाबी गर्दै आएको छ । मेयर उम्मेदवार कांग्रेसबाटै हुनुपर्ने दाबी गर्न कास्की कांग्रेसको टोली हालै सभापति शेरबहादुर देउवा लगायत नेता भेट्न काठमाडौं गएको थियो ।

‘गठबन्धन हुन्छ भन्दैमा कांग्रेसले आफ्नो उम्मेदवार तय नगरी बस्ने कुरा त भएन नि,’ कांग्रेस पोखरा महानगर समिति सचिव गणेशबहादुर थापाले भने, ‘कांग्रेसबाट हुने उम्मेदवार तय गर्न प्रक्रिया सुरु गरेका हौं ।’