पोखरा l
नेपाल निजामती कर्मचारी सगंठन जिल्ला कार्यसमिति कास्कीले बुधबार खुला रक्तदान आयोजना गर्‍यो । संगठनको स्थापना दिवसको अवसरमा भएको कार्यक्रममा २० युनिट रगत संकलन भएको अध्यक्ष विष्णुदेवी पोखरेलले जानकारी दिइन् ।

पेशागत महासंघ नेपालका स्थायी समितिका सदस्य रामप्रसाद खनालले संगठनले स्थापना दिवसको अवसरमा बर्सेनी रक्तदान लगायतका सामाजिक कार्यक्रम गर्ने गरेको बताए । संगठन कास्की अध्यक्ष पोखरेलले संगठनले सार्वजनिक सेवा प्रवाहलाई चुस्त, दुरुस्त बनाउन र संस्थागत सुशासनको पक्षमा काम गरेको उल्लेख गरिन् । उनले मुलुक संघीय संरचनामा गएसँगै पालिका स्तरमा कमिटी निर्माण गरेको जानकारी दिइन् ।

‘संघीयतामा सुशासन सामाजिक सुरक्षा र श्रमको सम्मान, राजनीतिक अधिकार सहितको ट्रेड युनियन हाम्रो अभियान’ भन्ने नाराका साथ संगठनले सिर्जनात्मक र रचनात्मक कार्यक्रम गरेको सचिव नवीनकिरण भुसालले बताए ।