गोरखा ।
जनता समाजवादी पार्टीका नेता बाबुराम भट्टराईको गृहजिल्ला गोरखामा उनको पार्टीलाई गठबन्धनका अरु दलले स्थानीय तहको उम्मेदवारीमा भाग नदिने भएका छन् । जसपाले गोरखाका २ पालिका प्रमुख आफ्नो पार्टीलाई दिनुपर्ने माग गरेको थियो । तर गठबन्धनका दलहरु कांग्रेस, माओवादी, नेकपा एससहितको बैठकमा शनिबार बिहान त्यसबारे सहमति जुट्न सकेको थिएन ।

सहमति जुट्न नसकेपछि ४ दलीय संयन्त्रको बैठक भाँडिएको थियो । लगत्तै कांग्रेस र माओवादीले मात्रै पालिकाहरुमा भागबन्डा गर्ने निर्णय गरेका छन् । दुई दलका नेताले ११ मध्ये कांग्रेसले ७ पालिका र माओवादी केन्द्रले ४ पालिकाको प्रमुख लिने गरी सहमतिपत्रमा हस्ताक्षर गरेका छन् ।

कांग्रेसले गोरखा नगरपालिका, गण्डकी गाउँपालिका, भीमसेन थापा गाउँपालिका, आरुघाट गाउँपालिका, धार्चे गाउँपालिका, अजिरकोट गाउँपालिका र सिरानचोक गाउँपालिकामा अध्यक्ष लिने सहमति भएको छ । माओवादी केन्द्रले पालुङटार नगरपालिका, चुमनुब्री गाउँपालिका र यसअघि जितेको बारपाक सुलिकोट गाउँपालिका र शहीदलखन गाउँपालिका लिने निर्णय भएको छ ।

वडाको हकमा पनि यसअघि जितेको वडा यथावत लिने र बाँकी बाँडफाँड गर्ने सहमति दुईदलका नेताहरुबीच भएको छ । यसअघि गठबन्धन दल जनता समाजवादी र एकीकृत समाजवादीसहितको बैठकमा दलहरु सिट बाँडफाँडमा सहमति जुट्न सकेको थिएन । जसपाले एउटा नगरपालिकासहित दुईवटा पालिका दावी गरेपछि बैठक भाँडिएको थियो ।
भागवण्डा टुंगो लगाउन शनिबार बिहान बसेको बैठकमा दलहरूबीच सहमति नजुटेपछि मित्रवत् प्रतिस्पर्धा गर्ने गरी बैठक सकिएको थियो । बाबुराम भट्टराईको पार्टी जसपाले दुईवटा पालिकाको प्रमुख मागेको थियो । गोरखामा दुईवटा नगरपालिकासहित ११ वटा पालिका छन् ।