पोखरा l
नेपाल कम्युनिस्ट पार्टी (एमाले)का उम्मेद्वारलाई जिताउन नेपाल ट्रेड युनियन महासंघ (जिफन्ट) गण्डकी प्रदेश कमिटीले निर्वाचन परिचालन कमिटी गठन गरेको छ ।

जिफन्ट गण्डकी प्रदेश कमिटी अध्यक्ष रुद्रबहादुर खत्रीको संयोजकत्वमा ५ सय १ सदस्यीय निर्वाचन परिचालन कमिटी गठन गरेको हो । कमिटी अध्यक्ष खत्रीले प्रदेशका सबै पालिकालाई केन्द्रीत गरी कमिटी गठन भएका पालिकाका अध्यक्षको संयोजकत्वमा निर्वाचन परिचालन कमिटी गठन गरी एमालेका उम्मेद्वारलाई जिताउन लाग्ने बताए । उनले कमिटीको प्रथम बैठकले निर्वाचनमा एमालेलाई जिताउन सबै नेता तथा कार्यकर्तालाई निर्देशन दिएको जानकारी दिए ।

बैठकले अन्तर्राष्ट्रिय श्रमिक दिवस (१ मे) को अवसरमा वैशाख १८ गते गण्डकी प्रदेशमा जिफन्टका कमिटी भएका पालिकामा रचनात्मक तथा सिर्जनात्मक कार्यक्रम गर्ने निर्णय गरेको छ । अन्तर्राष्ट्रिय श्रमिक स्मृति दिवस (२२ अप्रिल)को सन्दर्भमा बिहीबार कामको शिलशिलामा दिवंगत श्रमिकप्रति श्रदाञ्जली अर्पण गरिएको छ । जिफन्ट राष्ट्रिय कमिटी उपाध्यक्ष तथा गण्डकी प्रदेश सभाका सदस्य मीना गुरुङले नेकपा (एमाले) ले मात्र श्रमिकको हक हित गर्न सक्ने बताइन् । उनले योगदानमा आधारित सामाजिक सुरक्षा लगायत नीति, कानुन निर्माण गरी कार्यान्वयन गर्ने श्रमिक पक्षीय पार्टी एमालेको भएको उल्लेख गरिन् ।