पोखरा ।
पार्टीले टिकट दिएर पनि मनोनयनका दिन टिकट खोसिएका नेकपा एमालेका नेता दीपक पौडेललाई भेट्न एमालेका वरिष्ठ उपाध्यक्ष ईश्वर पोखरेल आइतबार उनकै घर पुरञ्चौर पगेका छन् ।

पौडेललाई फकाउन पोखरेल पौडेल निवास गएका हुन् ।
अघिल्लो दिन टिकट दिएर अर्को दिन खोसिएपछि पौडेल घरबाट बाहिर निस्केका छैनन् । अपमान भएको भन्दै स्थानीय एमाले कार्यकर्ताले नै पौडेललाई घरबाहिर ननिस्कन सुझाएका थिए ।

पोखरेलले पौडेल र स्थानीय बासिन्दालाई समेत भेटेका छन् । भेटमा स्थानीय नेता र पौडेलले आफूलाई पार्टीले अन्याय र अपमान गरेको पोखरेलसँग गुनासो पोखेको एमाले स्रोतले बताएको छ । उपाध्यक्ष पोखरेल र पौडेलबीच झण्डै २ घण्टा गोप्य कुराकानी भएको छ । त्यो बीचमा पौडेलले आफ्ना गुनासा नेता पोखरेलसमक्ष राखेका थिए ।

पौडेलसँग समाधानले कुराकानी गर्न खोज्दा उनले भेटघाटमा भएको विषय बताउन चाहेनन् । परिवारका सदस्यले पनि पौडेलले आफ्नो सबै जीवन पार्टीलाई दिएको तर पार्टीले अपमान गरेको गुनासो पोखरेलसँग गरेका थिए ।
पौडेलको घरबाहिर जम्मा भएका स्थानीयसँग पनि वरिष्ठ उपाध्यक्ष पोखरेलले करिब २० मिनेट संवाद गरेका थिए । आक्रोशित स्थानीयलाई सम्झाउँदै पोखरेलले पौडेलको योगदानलाई पार्टीले सम्मान गर्ने आश्वासन दिएका छन् । उनले पौडेललाई चाडै अनुभूति हुने गरी न्याय गरिने प्रतिवद्धता गरेका छन् । पोखरेलले पोखरा महानगर पालिकामा एमालेलाई विजयी गराउन पनि पुरन्चौरबासीसँग आग्रहसमेत गरे ।

स्रोतका अनसार भेटमा असुन्तष्ट नेता पौडेलले पोखरामा एमालेले निर्वाचन जित्ने कुरामा शंका नगर्न उपाध्यक्ष पोखरेललाई आश्वस्त पारेका थिए ।