जोमसोम
स्थानीय तह निर्वाचन २०७९ का लागि हिमाली जिल्ला मुस्ताङका ५ वटै स्थानीय तहमा मतगणना स्थलको तयारी सकिएको छ । घरपझोङ गाउँपालिकामा मुख्य निर्वाचन कार्यालय जोमसोम, लोमान्थाङको लोमान्थाङ ,लोघेकर दामोदरकुण्डको चराङ,वारागुङ मुक्तिक्षेत्रको कागबेनी र थासाङ गाउँपालिकाको कोवाङमा मतदान केन्द्र क्षेत्र तोकी निर्वाचन मतगणना स्थल निर्माणकार्य मंगलबार सम्पन्न भईसकेको प्रमुख जिल्ला अधिकारी नेत्रप्रसाद शर्माले जानकारी दिए ।
यसैगरी स्थानीय तह निर्वाचनका लागि जिल्लाको ३८ वटै मतदान केन्द्रमा ३८ जना निर्वाचन अधिकृत,३८ जना सहायक मतदान अधिकृत र ५ जना जगेडा निर्वाचन अधिकृत गरी कुल ८१ जनाका कर्मचारीहरु निर्वाचन सामाग्रीसहित सम्वन्धित मतदान केन्द्रमा पुगिसकेका छन् ।
यसअघि सोमबार जिल्ला निर्वाचन कार्यालय जोमसोमले ३८ वटै मतदान केन्द्रमा खटिने कर्मचारीलाई निर्वाचन सामाग्री जिम्मा लगाएको थियो । उनीहरुसंगै म्यादी प्रहरी,जनपथ प्रहरी र सशस्त्र प्रहरीको झन्डै ५ सय भन्दा बढी सुरक्षाकर्मी समेत मतदान केन्द्रमा खटिसकेका छन् । प्रत्येक मतदान केन्द्रमा नेपाल प्रहरी र सशस्त्र प्रहरीको मोवाईल टिम समेत परिचालन गरिएको प्रजिअ शर्माले जानकारी दिए । निर्वाचनलाई निश्पक्ष,पारदर्शी,भयरहित वातावरणमा सम्पन्न गर्न सबै मतदान केन्द्रमा सुरक्षा गस्ती चुस्त पारिएको छ ।

बैशाख ३० गते हुने स्थानीय तह निर्वाचन कार्यक्रमका लागि मतदान केन्द्रमा पुगिसकेका निर्वाचन अधिकृतहरुले बुधबार र बिहिबार सम्वन्धित मतदान केन्द्रमा मतदाता शिक्षा दिने मुख्य निर्वाचन अधिकृत रोमाकान्त ज्ञवालीले जानकारी दिए ।यसअघि ३८ वटै मतदान केन्द्रमा खटिने कर्मचारीहरुलाई निर्वाचन सम्वन्धित आवश्यक तालिम दिईएको थियो ।
स्थानीय तह निर्वाचनका लागि बुधबार देखि मतदान स्थलको आवश्यक पूर्वाधार निर्माण र निर्वाचन सम्वन्धि आवश्यक तयारी समेत अघि बढाईने मुख्य निर्वाचन अधिकृत ज्ञवालीले बताए ।
बैशाख ३० गते हुने स्थानीय तह निर्वाचनमा म्यादी प्रहरी र प्रहरीले पहिलो घेरामा सशस्त्र प्रहरीले दोश्रो घेरामा र नेपाली सेनाले तेश्रो घेरामा सुरक्षा प्रदान गर्ने जनाईएको छ ।

फोटो ः
मुस्ताङका ५वटै तहमा मतगणना स्थल निर्माण सम्पन्न ।