पोखरा ।

नेकपा एमाले मादी गाउँपालिका कमिटीले निर्धारित चुनावी अभियान सकेको छ ।

मंगलबार मादी ४ तारकाङमा सभा गरेर एमालेले गत १६ वैशाखदेखि सुरु भएको मतदाता भेटघाट सकेको हो । मंगलबार मध्यरात १२ बजेदेखि मौन अवधि सुरु हुने भएकाले अब प्रचारका कार्यक्रम गर्न पाइँदैन । मादीमा एमालेबाट गाउँपालिका अध्यक्षमा शिवबहादुर गुरुङ ९महेन्द्र० र उपाध्क्षमा कल्पना गुरुङ उम्मेद्वार छन् ।

सभामा बोल्दै अध्यक्ष उम्मेद्वार महेन्द्रले गाउँका उत्पादनलाई बजारीकरणको व्यवस्था गर्ने प्रतिबद्धता जनाए । गाउँका स्थानीयलाई असर नपर्ने ठाउँमा वधशाला बनाउने उनले बताए । ‘दुध–घ्यू बेच्नेमात्रै होइन । दुध दिन छोडेपछि मासुमा परिणत गर्न गाउँमा कसैलाई असर नपर्ने ठाउँमा बधशाला बनाएर यहाँ उत्पादन भएको मासुलाई बजारसम्म व्यवस्थापन गर्न चाहन्छौँ,’ उनले भने ।

शहर झरेका मादीबासीलाई गाउँ फर्काउन पहल गर्ने महेन्द्रले बताए । ‘मान्छे बजारतिर बस्छन्, यता खेतीपाती छ । घरमा कोही नभएपछि जंगलको बाँदर घरमा पस्छन् । बाँदर धपाउन हामी बन्दुक पड्काउँदैनौँ,’ महेन्द्रले थपे, ‘बन्दुकको आवाजले चराचुरुङ्गीलाई नोक्सान हुन्छ । हामी शहरमा भएका गाउँबासीलाई गाउँ फर्काउन पहल गर्छौं ।’ विपक्षीले पैदा गरेका भ्रममा नपर्न उनले मादीका मतदातालाई आग्रह गरे ।

उपाध्यक्ष उम्मेद्वार कल्पना गुरुङले कुनै विवादित काम नगरी निष्पक्ष भएर विकास निर्माणमा खटिने प्रतिबद्धता जनाइन् । ‘संस्थापक नेतृत्वले गरेको काम जुन बाँकी छन् तिनै जगमा टेकेर बाँकी कामलाई पूर्णता दिने छु ।

मादीमा नेकपा ९एमाले०बाट अध्यक्षमा महेन्द्र, उपाध्यक्षमा कल्पनासँगै मादी १ मा उमरबहादुर गुरुङ, २ मा एकाजंग गुरुङ, ३ मा ज्यामप्रसाद गुरुङ, ४ मा शिवप्रसाद सापकोटा, ५ मा सुब्बा गुरुङ, ६ मा डिलबहादुर क्षेत्री, ७ मा रामप्रसाद गुरुङ, ८मा प्रेमबहादुर गुरुङ, ९ मा मनोजकुमार गुरुङ, १० मा रामराज सुवेदी, ११ मा सिंहमान तामाङ र १२ मा प्रकाश बराल उम्मेद्वार छन् ।