काठमाडौं l
कोरोना महामारीको जोखिम घटेसँगै नेपाल भित्रने पर्यटकको संख्या बढ्न थालेको छ । अध्यागमन विभागका अनुसार सन् २०२२ सुरु भएपछिको पहिलो ४ महिनामा विभिन्न देशबाट नेपालमा कुल १ लाख ३७ हजार ९५ जना पर्यटक आएका छन् ।

जनवरीमा १६ हजार ९ सय ७५, फेब्रुअरीमा १९ हजार ७ सय ६६, मार्चमा ४२ हजार ६ जना र अप्रिलमा ५८ हजार ३ सय ४८ जना पर्यटक नेपाल आएको विभागले जनाएको छ । कोरोना भाइरस पहिलो पटक सन् २०१९ डिसेम्बर अन्तिम साता चीनको वुहानमा देखिएको थियो । त्यसपछि यो विश्वभर फैलिएको थियो।

कोरोना महामारी विश्वभर फैलिएपछि यसलाई नियन्त्रण गर्न गरिएको लकडाउनले पर्यटकको आवतजावत प्रायः ठप्प भएको थियो । अघिल्लो वर्ष सन् २०२१ को पहिलो ४ महिनामा नेपालमा मात्र ५५ हजार ४ सय ४७ जना पर्यटक भित्रिएका थिए । अघिल्लो वर्षको तुलनामा यस वर्ष पर्यटन आउने संख्या उल्लेख्य रुपमा बढेको विभागको तथ्यांकले देखाउँछ ।