पोखरा ।
स्थानीय तह निर्वाचनअन्र्तत आज कास्कीमा मध्यान्न १२ बजेसम्म ५० प्रतिशत मत खसेको छ । बिहान ७ बजेदेखि सुरु भएको मतदानमा बिहानैदेखि अधिकांश मतदान केन्द्रमा मतदाता खचाखच लामबद्ध भएको तथा १२ बजेसम्म करिव ५० प्रतिशत मत खसेको निर्वाचन आयोग कास्कीले जानकारी दिएको छ ।

हालसम्म सबै मतदान केन्द्रमा शान्तिपूर्ण रुपमा मतदान भइरहेको निर्वाचन आयोग कार्यालय कास्कीका सुचना अधिकारी रुद्र न्यौपानेले जानकारी दिए । निर्वाचनमा सर्वसाधारणको उत्साहपूर्ण सहभागिता रहेको उनले बताए ।

कूल ३३६ मतदान केन्द्र रहेको कास्कीका पाँच पालिकामध्ये पोखरा महानगरपालिकामा दुई लाख सात हजार ७१२ जना मतदाता छन् भने अन्नपूर्ण गाउँपालिकामा २० हजार ३४८ मतदाता छन् । माछापुच्छ्रे गाउँपालिकामा २० हजार ३१६, मादी गाउँपालिकामा १८ हजार ७८२ र रुपा गाउँपालिकामा १४ हजार ६७५ मतदाता रहेका छन् ।