जोमसोम–स्थानीय तह सदस्य निर्वाचन सकिए लगत्तै हिमाली जिल्ला मुस्ताङको घरपझोङ र थासाङ गाउँपालिकामा कार्यपालिका निर्वाचनको प्रक्रिया अघि बढाईएको छ । घरपझोङ र थासाङ गाउँपालिका शुक्रबार नेकपा एमाले ,कागे्रस,राप्रपा,माओवादी केन्द्र र एकिकृत समाजवादीले मनोनयपत्र दर्ता गराएका छन् । घरपझोङ र थासाङमा कार्यपालिका निर्वाचन जेठ १३ गते हुने जनाईएको छ ।
स्थानीय तह सदस्य निर्वाचन अन्तर्गत घरपझोङ गाउँपालिकामा नेपाली कांग्रेसले अध्यक्ष र उपाध्यक्षसहित १२ पद जितेको छ । नेकपा एमाले दुई वडाध्यक्षसहित ११ पद जितेको थियो । यस्तै, राप्रपाले २ ,माओवादी केन्द्रले १ र एकिकृत समाजवादीले १ पद जितेको थियो ।गाउँपालिकाको कुल २७ पद मध्ये सबै सदस्यले निर्वाचनमा भाग लिएको अवस्थामा कार्यपालिका सदस्यमा निर्वाचित हुन १४ जना सदस्य आवश्यक पर्ने हुन्छ । तर घरपझोङमा कांग्रेस र एमालेको १४ जना सदस्य अपुग हुने हुदा राजनितिक समिकरण आवश्यक पर्ने देखिएको हो ।

कार्यपालिका सदस्यका लागि उम्मेदवार हुन गाउँसभामा निर्वाचित ४ जना महिला र गाउँसभाले निर्वाचित गराउने २ जना दलित वा अल्पसंख्यक सदस्य कार्यपालिकामा आउने पाउँने व्यवस्था गरिएको छ । मुस्ताङको घरपझोङमा कार्यपालिका सदस्य निर्वाचनका लागि कांग्रेस,माओवादी केन्द्र र समाजवादीको तालमेल हुने देखिएको छ । कांग्रेसबाट महिलातर्फ लक्ष्मीकुमारी थकाली र सरिता नेपालीले उम्मेदवारी दिएकी छिन् । माओवादी केन्द्र र समाजवादीबाट जैकला विक र दुर्गादेवी रसाईलीले कार्यपालिका सदस्यका लागि उम्मेदवारी दर्ता गरेका छन् ।कांग्रेसबाट दलित र अल्पसंख्यक सदस्यतर्फ राजुप्रसाद लालचन र सुरेन्द्र थकालीले उम्मेदवारी दिएका छन् ।
यस्तै,नेकपा एमालेले पनि ४ महिला र १ दलित वा अल्पसंख्यक सदस्य कोटामा कार्यपालिका सदस्य हुन उम्मेदवारी दिएका छन् । अल्पसंख्यक कोटामा एमालेबाट भीषण थकाली र राप्रपाकी कमला लालचन अधिकारीले कार्यपालिका सदस्यका लागि उम्मेदवारी दिएको प्रमुख प्रशासकीय अधिकृत गौरीनाथ आचार्यले जानकारी दिए । घरपझोङमा कार्यपालिका समिकरण हेर्दा कांग्रेस प्यानलबाट माओवादी र समाजवादीको सदस्य जोड्दा १४ मत हुन्छ भने एमाले प्यानलबाट राप्रपाको मत जोड्दा १३ पुग्छ ।
कांग्रेस र एमाले अलग अलग प्यानलबाट निर्वाचन हुँदा कांग्रेस प्यानल बिजयी हुन अवस्था देखिन्छ । यद्यपी गाउँसभाका २७ जना सदस्य मध्ये कुनै उम्मेदवारहरुका लागि मत फरक ढंगले विभाजित हुँदा वा अनुउपस्थित रहदा कार्यपालिकाको निर्वाचन परिणाम फरक ढंगले आउनसक्ने अनुमान गरिएको छ । कांग्रेसले गठबन्धन जोगाउन सकेमा प्यानल बिजयी हुनेछ भने एमालले कुनै सदस्यलाई तान्न सके पनि बराबरीको अवस्था रहन्छ ।
यस्तै,मुस्ताङको थासाङ गाउँपालिकामा पनि कार्यपालिका सदस्य निर्वाचन रोचक हुने अनुमान गरिएको छ ।थासाङमा नेकपा एमाले पालिका अध्यक्ष र १ वडाध्यक्षसहित १४ सदस्य जितेको छ । कांग्रेसले पालिका उपाध्यक्ष र ४ वडाध्यक्षसहित १३ सदस्य जितेको छ ।थासाङमा नेकपा एमाले र कांग्रेसले ४ महिला सदस्य र २ दलित वा अल्पसंख्यक सदस्य गरी ६–६ पदमा उम्मेदवारी दर्ता गराएको प्रमुख प्रशासकीय अधिकृत नगेन्द्र सुवेदीले जानकारी दिए ।
एमालेबाट किपल थकाली, दिलकुमारी नेपाली,देवचन्द्र शेरचन, पदमिनी विक,विक्रम गौचन र हिमा विकले कार्यपालिका सदस्यका लागि उम्मेदवारी दिएका छन् । यस्तै,कांग्रेसबाट जिनमती सिङजाली मगर,तिलकुमारी नेपाली,दविका विक,राधिका सार्की,विमला तुलाचन र सुर्ज गौचनले कार्यपालिका सदस्यका लागि उम्मेदवारी दिएको प्र्रशासकीय अधिकृत सुवेदीले जानकारी दिए ।
थासाङमा नेकपा एमाले र कांग्रेसका मात्रै गाउँसभामा निर्वाचित भएका हुन् । दुबै पार्टीको १३ र १४ मत हुँदा १ मतको मात्र फरक छ । १ मतले पछि परेको कांग्रेसले नेकपा एमालेको मत आफुले पाउँने अपेक्षा गरी ६ वटै पदमा उम्मेदवारी दिएको हो ।
दुबै पालिकामा १–१ मतको फरक रहदा कार्यपालिका निर्वाचनमा कुन सदस्यले कार्यपालिका निर्वाचन जित्नसक्छन भन्ने अवस्था निर्वाचनपछि मात्र निक्र्योल गर्न सकिने छ ।
गाउँ सभाका कुनै एक सदस्य १३ गते हुँने मतदानमा अनुउपस्थित रहदा बराबरी हुने र एक जना सदस्यले एमालेबाट कांग्रेसमा क्याम्प परिवर्तन गरे मात्र कांग्रेसको जीत हुने अवस्था रहन्छ । नेकपा एमालेले आफ्नो मत सुरक्षित राख्न सकेमात्र ६ वटै सदस्यलाई कार्यपालिका जिताउन सहज हुन्छ ।
थासाङमा केन्द्र कहाँ राख्ने भन्ने विवाद अझै सुल्झिएको छैन । नेपाल सरकारको राजपत्रमा पालिकाको केन्द्र कोवाङमा रहने जनाईएपनि यसमा मुद्धा परेपछि गाउँपालिकाको भवन निर्माणको काम समेत हुन सकेको छैन । पार्टी गत हिसाबले नभई क्षेत्र गत हिसाबले कार्यपालिका निर्वाचनमा मत विभाजित हुने अवस्था रहे अपेक्षा गरिए भन्दा फरक नतिजा आउन सक्छ ।
स्थानीय तहको गाउँसभाबाट कार्यपालिका सदस्यका अध्यक्ष,उपाध्यक्ष र ५ जना वडाध्यक्ष स्वतः कार्यपालिका सदस्य हुने व्यवस्था छ । यस्तै कार्यपालिकाको सदस्य सचिवमा प्रमुख प्रशासकीय अधिकृतलाई सदस्य सचिवमा राख्ने प्रावधान छ । निर्वाचित ६ जना ,गाउसभाका ७ र प्रशासकीय गरी १४ जनाको कार्यपालिका सदस्य बन्दछ ।