जोमसोम–

मुस्ताङमा बुधबार २ जना व्यक्तिको वेवारिसे शव फेला परेको छ ।मुस्ताङको घरपझोङ गाउँपालिका–२ मार्फा स्थित कालिगण्की नदी दोभान र लोघेकर दामोदरकुण्ड जाने बाटोमा अलग÷अलग व्यक्तिको शव फेला परेको जिल्ला प्रहरी कार्यालय मुस्ताङले जनाएको छ ।
घरपझोङ –२ को मार्फा खोला र कालिगण्डकी नदी दोभानमा अन्दाजी ३७÷३८ वर्षीय पुरुष व्यक्तिको शव फेला परेको जिल्ला प्रहरी कार्यालयका सूचना अधिकारी प्रहरी निरीक्षक राजकुमार तामाङले जानकारी दिए । पैदलयात्रा गर्दै गरेका एक विदेशी पर्यटक कालिगण्डकी नदीको छेउमा वेवारिसे शव मृत अवस्थामा देखेपछि ति पर्यटकले स्थानीयलाई जानकारी गराएका थिए । कालिगण्डकी नदीमा मृत शव फेला परेको जानकारी पाएपछि स्थानीयले बिहान करिव १० बजे प्रहरीलाई खबर गरेका थिए ।त्यसपछि जिल्ला प्रहरी कार्यालय जोमसोमबाट प्रहरी टोली घटना स्थलमा पुगेर शवको मुचुल्का र अनुसन्धान सुरु गरेको प्रहरी निरीक्षक तामाङले उल्लेख गरे ।
प्रहरीले कालिगण्डकी नदीबाट शव निकालेर पोष्टमार्टमका लागि मुस्ताङ जिल्ला अस्पतालको शवगृहमा राखेको जनाएको छ ।छोटो दारी जुंगा पालेको ,गोरो अनुहा भएको र मंगोलियन हुलिया भएको उक्त वेवारिसे शवको नाम,थर र ठेगाना पहिचान हुन सकेको छैन ।प्रहरीले वेवारिसे शव फेला परेका व्यक्तिको आफन्तको खोजीकार्य अघि बढाएको छ ।
यस्तै, समुन्द्री सतहदेखि अग्लो उचाईमा अवस्थित प्रसिद्ध धार्मिक स्थल दामोदरकुण्डतर्फ जादै गरेका अन्दाजी ५५÷६० वर्षीय एक भारतीय पुरुषको शव पनि बुधबारनै फेला परेको प्रहरीको भनाई छ ।ति पुरुषको शव दामोदरकुण्ड पदमार्गको ढुङ्गेठाटी नजिक बिहान ७ बजे फेला परेको प्रहरी निरीक्षक राजकुमार तामाङले जानकारी दिए ।उनका अनुसार उक्त मृत फेला परेका नागरिक मुक्तिनाथ मन्दिरमा बस्ने जोगी भएको बताएको छ ।

दोमोदरकुण्ड जाने बाटोमा शव फेला परेपछि नजिकैको प्रहरी टोली घटनास्थलतर्फ जाँदै गरेको उनले बताए । शप भेटिएको स्थानमा पुग्न प्रहरीलाई करिव ७–८ घण्टा लाग्नसक्ने प्रहरी निरीक्षक तामाङले बताए । घटनाबोर बिस्तृत जानकारी आउन बाँकी रहेको उनले जनाए ।