पोखरा ।
विहान करिब ९:५५ मा पोखराबाट जोमसोमका लागि छुटेको तारा एयरको विमान अझै सम्पर्कमा आएको छैन । सम्पर्कविहीन विमानमा सिनियर पाइलट प्रभाकर घिमिरे, को पाइलट उत्सव पोखरेल, अर्का पाइलट वसन्त लामा र एयर होस्टेज किस्मी थापा सहित २२ जना यात्रु सवार थिए ।

तारा एयरकै पाइलट वसन्त लामा विदा मनाउन जोमसोम जान लागेका थिए । लामाले आइतबार बिहानै चारवटा उडान सकेर बिदा मनाउन जोमजोमका लागि उडेका हुन् ।

तारा एयर स्रोतका अनुसार जोमसोम जानुअघि पाइटल लामाले चार उडान भरेका थिए । बिहान विमान उडाएर पछि पाइलट प्रभाकर घिमिरेलाई ह्यान्डओभर गरेका थिए । यात्रुको सूचीमा उनको समेत नाम उल्लेख गरिएको छ। उनी टिकट नै लिएर विमानमा सवार थिए । सोही उडानमार्फत उनी जोमसोमतिर लागेका थिए ।

सम्पर्कविहीन विमानमा सवार यात्रुको नामावली सार्वजनिक भएको छ । जसमा पाइलट लामाको पनि नाम छ । उक्त विमान मुस्ताङको लेतेबाट सम्पर्कविहीन बनेको थियो ।

विमान दुर्घटना भएको आशंका गरिएको छ । नेपाली सेना, नेपाल प्रहरी र तारा एयरको उद्दार टोली स्थलमार्गबाट त्यसतर्फ प्रस्थान गरिसकेको छ ।