जोमसोम–

आईतबार मुस्ताङको आकाशमा सम्पर्क विहिन अवस्थामा रहेको तारा एअरको ९ एनईटी जहाजमा सवार सबै यात्रुको मृत्यु भएको हुनसक्ने आशंका गरिएको छ ।
मुस्ताङको थासाङ गाउँपालिका–२ को उच्चलेक सानोसरेमा तारा एअरको जहाज क्षतविक्षत रुपमा फेला परेपछि जहाजमा यात्रा गर्ने १९ यात्रुसहित चालक दलका ३ जना सदस्यको मृत्यु भएको आशंका गरिएको छ ।जहाज खोज्न मानापाथी लेंक पुगेका थासाङका स्थानीय युवा सुमित गौचनले जहाजको अवस्था हेर्दा सबै यात्रुको मृत्यु भएको हुनसक्ने अनुमान गरे । तर यसको पूर्ण जानकारी लिई पुष्टि गर्न तत्काल नसकिने जानकारी दिए ।जहाज थासाङको सानोसरे पहाडमा ठोक्किएर दुर्घटना भएको जहाजको तस्विरसहितको विवरणले झल्काएको छ । जहाजमा सवार यात्रुहरुको लकेज र अन्य सामानहरु समेत पहाडको चारैतिर छरपष्ट छरिएको देखिन्छ ।दुर्घटना ग्रस्त जहाजको घटना स्थलको प्रकृति हेर्दा केही यात्रुको लाश समेत सार्वजनिक भएको तस्विरमा देखिन्छ ।
थासाङ–२ नाउरिकोटका स्थानीय गिरिसिंह शेरचनले घटना स्थल सानोसरे पहाडमा गिद्धहरु घुमिरहेको जानकारी दिए । उनले गिद्धहरु सानो सरेपहाडमा घुमिरहेकाले जहाजमा सवार यात्रुहरुको मृत्यु भएको हुनसक्ने अनुमान गरे । जहाजमा सवार यात्रुको पछिल्लो अवस्था बुझ्न जोमसोमबाट फिस्टेल एअरको माउन्टेन हेली दुर्घटनाग्रष्तक्षेत्रमा पुगिसकेको मुस्ताङका प्रजिअ नेत्रप्रसाद शर्माले जानकारी दिए । फिस्टेलको जहाज र्फिर्कएपछि सवै विवरण प्राप्त हुने प्रजिअ शर्माले उल्लेख गरे ।