पोखरा ।

नवनिर्वाचित मेयर धनराज आचार्यले पोखरा लेकसाइड सडक माझको डिभाइडरमा रोपेका फूल चोरी भएको अर्को दिन फेला परेका छन् । ताल बाराही माविको व्यायामशाला नजिक झोलामा राखिएको अवस्थामा सोमबार फूल भेटिएको हो ।

स्थानीयले सिसी क्यामेराबाट फूल चोर खोजेका थिए । पोखरा ६ का पूर्व वडासदस्य हरि पहारी र स्थानीय राजेन्द्र तिवारीले व्यायामशाला नजिक झोलामा राखिएको अवस्थामा फूल भेटी वडा प्रहरी कार्यालय वैदामलाई बुझाएका थिए । उनीहरुले चोरसमेत भेटेर प्रहरीलाई बुझाएका थिए ।

मेयर आचार्यले सपथ ग्रहणपछि पदभार ग्रहणअघि लेकसाइडको ती सडक डिभाइडरमा फूल रोपेका थिए । उनले पोखरालाई फूलैफूलको सहर बनाउने घोषणा पनि गरेका थिए ।

मेयर आचार्यले चुनाव अघि जारी गरेको घोषणा पत्रमा पनि एक टोल एक बगैंचा र एक घर ५ गमला र एक फक्रेको फूल कार्यक्रम ल्याइने उल्लेख गरेका थिए ।