सुन्दरकुमार थकाली
जोमसोम–

मुस्ताङको थासाङ गाउँपालिका–२ कोवाङमा जम्मा गरिएको बाँकी १२ शव नेपाली सेनाको हेलिकोप्टरले बिहान ११ः४ मिनेट जाँदा काठमान्डौतर्फ लगेको छ ।

सोमबार मौसम प्रतिकुलताका कारण कोवाङ झार्न नसकेको १० शव र बाँकी २ शव गरी १२ शव आवश्यक प्रक्रिया पुरा गरी काठमान्डौं पठाईएको मुस्ताङका प्रमुख जिल्ला अधिकारी नेत्रप्रसाद शर्माले जानकारी दिए ।

पोखराबाट जोमसोमका लागि उडेको जहाज आईतबार मुस्ताङको थासाङ गाउँपालिका–२ स्थित मानापाथी हिमालको सानुसरे पहाडमा दुर्घटनाग्रस्त हुँदा जहाजमा सवार चालक दलसहित २२ यात्रुको मृत्यु भएको थियो ।

सोक्षेत्रमा खराव मौसमका कारण पहिलोदिनको शव संकलन गर्ने कार्य प्रभावित बनेपनि दोश्रोदिन २१ शव भेटिएकोमा १ वटा शव भीरबाट बाहिर निकाल्न सकेका थिएनन् । जहाजमा सवार २२ शव मध्ये २० जनाको शव संकलन भएपनि १ वटा शव निकाल्न बाँकी र खोज्न बाँकी १ शव मंगलबार बिहान बाहिर निकालिएको थियो ।
मौसम प्रतिकुलता र समय अभावका कारण दुर्घटनाक्षेत्रमा सोमबार जम्मा पारिएको १० शव र मंगलबार संकलन गरिएको २ शव गरी १२ शव माउन्टेन एअरको हेली मार्फत कोवाङमा झारिएको थियो ।

योसंगै ,तारा एअर जहाज दुर्घटनामा परी मृत्यु भएका यात्रुको शव संकलन गर्ने काम सम्पन्न भएको छ ।