पोखरा महानगरपालिका–१८ को वडाध्यक्षमा ३ मतले चुनाव हारेका एमाले उम्मेदवार पुस्कलबहादुर थापाले उच्च अदालत पोखरामा मुद्दा दर्ता गरेका छन् ।

यो वडामा नेपाली कांग्रेसका शिव तिमिल्सिनाले ३ मत अन्तरले चुनाव जितेको घोषणा मुख्य निर्वाचन अधिकृतको कार्यालयले गरेको थियो । तिमिल्सिनाले सपथ लिई पदभार ग्रहण गरिसकेका छन् । ५ हजार ८ सय ४३ मतदाता मध्ये यहाँ ४ हजार ३ सय ४८ मत खसेको थियो । गणनाका क्रममा ४ हजार ३ सय ३९ मत मात्र भेटिएको थियो । मतपत्र सर्टिङ गर्ने क्रममा नै ९ मत गायव पारिएको थापाको आरोप छ ।

निर्वाचन आयोग, मुख्य निर्वाचन अधिकृतको कार्यालय, मुख्य निर्वाचन अधिकृत र नव निर्वाचित वडाध्यक्षलाई विपक्षी बनाएर थापाले मुद्दा दिएका हुन् ।

थापाले गणना सकिएपछि मुख्य निर्वाचन अधिकृतको कार्यालयमा पुन गणनाको माग सहित निवेदन दिएका थिए । तर पुनः गणना भएको थिएन । उनले चुनावमा खसेको मतभन्दा ९ मत कम भएको भन्दै त्यसको खोजी गरिदिन मुद्दा हालेका हुन् ।