पोखरा ।
नेपाल मगर महिला संघको सातौँ राष्ट्रिय महाधिवेशन आइतबारदेखि पोखरामा सुरु हुँदै छ । नेपाल मगर महिला संघ केन्द्रीय समितिले पोखरामा शनिबार पत्रकार सम्मेलन गर्दै महाधिवेशन २४ गतेसम्म चल्ने जानकारी गराएको हो ।

जनसंख्याको आधारमा पूर्ण सामानुपातिक महिला प्रतिनिधित्वका लागि सशक्तीकरण र पहिचानको संरक्षण, सम्वद्र्धनको पक्षमा रणनीति बनाउने सवालमा महाधिवेशन केन्द्रीत हुने संघका केन्द्रीय समितिका अध्यक्ष विनिता आलेमगरले बताइन् ।

सामाजिक न्याय र मगर महिलाको मुक्तिका लागि २०५५ मा स्थापना भएको नेपाल मगर महिला संघ, केन्द्रीय समिति आगामी असोज ३ गतेदेखि २३ वर्षमाा प्रवेश गर्दै छ । संघले आफ्नो संगठनिक इतिहासमा सातौं राष्ट्रिय महाधिवेशन गर्न लागेको हो ।

महाधिवेशनमा संघको सात प्रदेशका प्रदेश समिति, विदेश शाखा, विदेशका महिला प्रमुख तथा महिला विभाग प्रतिनिधि र ५६ जिल्लाका प्रतिनिधि गरी २ सय ५० जनाको सहभागिता रहने आयोजकले जनाएको छ ।