सुन्दरकुमार थकाली।
जोमसोम ।
तारा एअरको नाइन एनइटी जहाज दुर्घटनाबारे जाँचुबुझ गर्न बनेको ५ सदस्यीय छानबिन टोली शनिबार दुर्घटना स्थल थासाङ गाउँपालिका २ को मानापाथी हिमालको फेंद स्थित सानुसरे पहाड पुगेर फर्किएको छ । टोलीका सदस्य दुर्घटना स्थल अवलोकन, अनुसन्धान र दुर्घटनाबारे तथ्य संकलन गरी फर्किएको मुस्ताङका प्रमुख जिल्ला अधिकारी नेत्रप्रसाद शर्माले जानकारी दिए ।

पोखराबाट जोमसोमका लागि उडेको तारा एअरको जहाज अघिल्लो आइतबार बिहान सम्पर्क विहीन भएको थियो । जहाज दुर्घटना भएको पहिलो दिन मौसमी प्रतिकुलताका कारण दुर्घटना स्थल पहिचान गर्न सकिएको थिएन । दोस्रो दिन बिहान लेंकमा यार्सा टिप्न गएको टोलीले दुर्घटना स्थल पत्ता लगाएरपछि उद्धार थालिएको थियो ।

जहाज दुर्घटनाको सत्यतथ्य छानबिन गर्न संस्कृति, पर्यटन तथा नागरिक उड्यन मन्त्रालयले सोमबार वरिष्ठ एरोनटिकल इन्जिनियर रतिसचन्द्रलाल सुमनको संयोजकत्वमा ५ सदस्ययीय जहाज दुर्घटना छानबिन समिति गठन गरेको थियो । समितिमा क्याप्टेन दीपुराज ज्वारचन, वरिष्ठ मेन्टिनेन्स ईन्जिनियर उपेन्द्रलाल श्रेष्ठ, वरिष्ठ मौसम विद् मणिरत्न शाक्य र पर्यटन मन्त्रालयका सहसचिव बुद्धिसागर लामिछाने छन् ।

छानबिन टोली एअर डायनोस्टिकको हेलीमार्फत दुर्घटना स्थल सानुसरे पुगेको थियो । उनीहरुले जोमसोम विमान स्थलका कर्मचारीसँग जहाज दुर्घटनाका कारण अन्य बिषयमा जानकारी लिएका थिए । तारा एअर जहाज दुर्घटना स्थलबाट जहाजका आवश्यक उपकरण तथा जहाजका महत्वपूर्ण सामान काठमाडौं लगिएको स्थानीय ईन्द्रसिंह शेरचनले बताए ।