पोखरा ।
विश्व वातावरण दिवसको अवसरमा ट्रेकिङ इक्युपमेन्ट सप एसोसियसन (टेसा) पोखराले पदयात्रा, पदमार्ग सरसफाइ तथा अन्तरक्रिया गरेको छ ।

टेसाले आइतबार पोखरा २५ हेमजा मेलबोटदेखि माछापुच्छ्रे गाउँपालिका–६ अस्ताम र वडा नम्बर ७ धम्पुससम्मको पदमार्गमा सरसफाइ गरेको हो । उक्त पदमार्गमा झण्डै १० बोरा फोहोर टेसाले सफाइ गरेको छ । संकलित फोहोर माछापुच्छे« ६ का वडाध्यक्ष टेकनाथ गौतम र ७ का वडाध्यक्ष वैकुण्ठ भण्डारीलाई टेसाले हस्तान्तरण गरेको छ । टेसा पोखराका अध्यक्ष नारायण सापकोटाले वार्षिक कार्यक्रम अनुसार वातावरण दिवसमा १ दिनको पदयात्रा र पदमार्ग सरसफाइ गरेको बताए ।

‘पोखराबाट नजिकका गन्तव्यमा हाइकिङ सहित सरसफाइ गर्ने गरेका छौं,’ उनले भने, ‘यसले आफ्नो गाउँ, टोल, पदमार्गलाई सफा राख्नुपर्छ भन्ने सांकेतिक सन्देश दिन र पर्यटन प्रवद्र्धनमा पनि मद्दत पुगेको छ ।’ टेसाले माछापुच्छे« ७ मा आइतबार नै विश्व वातावरण दिवसका अवसरमा अन्तरक्रिया कार्यक्रम गरेको छ ।

कार्यक्रममा पोखरा पर्यटन परिषद्का अध्यक्ष गोपीबहादुर भट्टराईले विश्वभर मनाइने वातावरण दिवस पोखरामा पनि पर्यटनसँग सम्बन्धित संस्थाले मनाउनु अर्थपूर्ण भएको बताए । ‘अहिले ट्रेकिङ रुट मासिँदै गएका छन् । भएकामा पनि फोहोर त्यस्तै छ,’ उनले भने, ‘विदेशी पर्यटक डाइभर्ट हुने हुन् कि भन्ने चिन्ता छ । त्यसका लागि स्थानीय जनप्रतिनिधिले नै मुख्य रुपमा सोच्नुपर्छ ।’

माछापुच्छ्रे ७ का वडाध्यक्ष वैकुण्ठ भण्डारीले गाउँकार्यपालिकाको पहिलो बैठकमा वातावरणको मुद्दालाई प्रमुखताका साथ उठान गर्ने प्रतिवद्धता गरे । उनले मोटरबाटोको सट्टा वैकल्पिक पदयात्रा मार्गको संरक्षण आफ्नो प्राथमिकतामा रहेको सुनाए ।

पोखरा उद्योग वाणिज्य संघका उपाध्यक्ष गोकर्ण कार्कीले टेसाको उक्त कार्यक्रमले स्वास्थ्यमा सचेतना र व्यवसायको प्रवद्र्धनमासमेत सहयोग पुगेको बताए । टेसाले झण्डै १२ किलोमिटर लामो पदमार्गमा रहेका प्लास्टिकजन्य फोहोर संकलन गरेको छ ।