पोखरा ।

शिक्षा र खेलकुदको क्षेत्रमा सक्रिय पोखरेली योगेन्द्र बस्नेतको निधन भएको छ । उनी ७५ वर्षका थिए । पोखरा १० अमरसिंहचोक निवासी बस्नेतको काठमाडौंस्थित मेडिसिटी अस्पतालमा उपचारकै क्रममा बुधबार निधन भएको पारिवारिक स्रोतले जनाएको छ ।

मेडिसिटीमा मंगलबार उनको आन्द्राको अप्रेसन भएको थियो । पश्चिमाञ्चल क्षेत्रीय अस्पतालमा नियमित उपचारपछि अपरेसनका लागि बस्नेतलाई मेडिसिटी लगिएको थियो ।
बस्नेतको पार्थीव शरीरलाई अमरसिंह शान्तिपथस्थित निवासमा राखेर श्रद्धाञ्जली दिने कार्यक्रम छ । अन्त्येष्टि सेतीनदीको रामघाटमा हुने भएको छ ।
पश्चिमाञ्चल क्षेत्रीय शिक्षा अधिकारी, कास्कीमा जिल्ला शिक्षा अधिकारी, स्थानीय विकास अधिकारी, पोखरा उपत्यका नगर विकास समितिको अध्यक्ष रहेर सेवा गरेका स्व. बस्नेत एथ्लेटिक्सका अन्तर्राष्ट्रिय खेलाडीसमेत हुन् । स्व. बस्नेतका २ श्रीमती, २ छोरा र २ छोरी छन् ।