पोखरा ।
माओवादी केन्द्र अध्यक्ष पुष्पकमल दाहाल प्रचण्डले माओवादीले जितेको १ सय २२ पालिकामा फागनु १ मा बिदा दिन पालिका नेतृत्वलाई आग्रह गरेको छन् । उनले फागुन १ गतेलाई विशेष पर्व मनाउनुपर्ने बताए ।

बिदा दिँदा जनयुद्ध दिवसलाई राष्ट्रिय दिवस दाबी गर्न बल पुग्ने उनले बताए । पोखरामा शनिबार गण्डकी प्रदेशका स्थानीय तहमा माओवादी केन्द्रबाट निर्वाचित जनप्रतिनिधि र कार्यकर्ताको अभिमुखीकरण कार्यक्रममा प्रचण्डले यस्तो बताएका हुन् । स्थानीय पालिकाहरूमा जनताको नियन्त्रण, निगरानी र हस्तक्षेप सुनिश्चित गर्नुपर्ने प्रचण्डले बताए ।

शासकीय स्वरुप बदल्ने आन्दोलन ढिलोचाँडो सुरु गर्नुपर्ने अवस्था आएको उनले बताए । संविधान बनाउँदा शासकीय स्वरुप र पहिचानको मुद्दा ठीक ढंगले अझै बनिनसकेकाले फेरि एकपटक क्रान्ति गर्नुपर्ने देखिएको प्रचण्डको भनाइ थियो । ‘हामी सिधासिधा कुरा गर्न सिपालु छौं । क्रान्ति गर्ने, जोश आउँछ । सिपालु छौं,’ क्रान्तिमा होमिए सफल भइन्छ,’ उनले भने ।

उनले कार्यकर्तालाई त्याग, तपस्या र मेहेनत गरेर काम काम गर्न निर्देशन दिए । उनले माओवादी अन्य पार्टीभन्दा फरक भएर काम गर्न पार्टी नेता कार्यकर्तालाई निर्देशन दिए । ‘जनताले हेर्दा माओवादी, कांग्रेस, एमाले सबै उस्तै देखिए । हामी जनताको पक्षमा भरपुर काम गरेर देखाउनुपर्छ,’ प्रचण्डले भने ।

आगमी प्रदेश र संघको निर्वाचनमा माओवादी पार्टी पहिलो हुने गरी काम गर्न जनप्रतिनिधिहरुलाई निर्देशन दिए । माओवादी बलियो भएको ठाउँमा सबै पार्टी मिलेर माओवादीलाई कमजोर बनाउने काम गरेकाले यो गठबन्धनको मर्म विपरीत भएको उनले बताए ।