पोखरा ।
रोटरी क्लब इन्टरनेसनल डिस्ट्रिक्ट ३२९२ नेपाल भुटान अन्तर्गतको रोटरी क्लब अफ पोखराको २५ औं वार्षिकोत्सव भएको छ । रजत वर्ष समारोहमा रोटरी वर्ष २०२२-०२३का लागि नयाँ कार्य समिति प्रस्ताव गरिएको छ । सन २०२२को जुलाईबाट कार्यकाल सुरुवात हुने कार्य समितिको अध्यक्षमा राजेन्द्र गौतम चुनिएका छन् ।

गण्डकी प्रदेशका मुख्यमन्त्री कृष्णचन्द्र नेपाली पोखरेलले खुल्ला समाज, लोकतान्त्रिक व्यवस्था, नागरिक समाज र अन्तर्राष्ट्रिय संस्थाले काम गरेको देशमा दिगो र वास्तविक विकास हुने बताए । रोटरी लगायतका सामाजिक संघ संस्थाले सभ्य र समुन्नत समाज निर्माणमा सहयोग गरेको उल्लेख गर्दै उनले सामाजिक संघ संस्थासँग सहकार्य गरेर समृद्धिको एजेण्डा साकार पार्न सकिने चर्चा गरे ।

‘रोटरी क्लबहरुले शिक्षा, स्वास्थ्य खानेपानी तथा सामाजिक क्षेत्रमा गरेको कामले समाजमा सकारात्मक परिवर्तन ल्याएको छ,’मुख्यमन्त्री पोखरेलले भने, ‘भौतिक विकाससँगै मानवीय विकासलाई केन्द्र बिन्दुमा राखेर काम गर्नु आवश्यक छ ।’ उनले समग्र प्रदेशको समृद्धिको लागि सबै संघ संस्थासँग समन्वय र सहकार्य गर्ने उल्लेख गरे ।

रोटरी क्लबका पूर्व डिस्ट्रक गभर्नर किरणलाल श्रेष्ठले निस्वार्थ भावले रोटरी क्लबहरुले शिक्षा, स्वास्थ्य, खानेपानी तथा समुदायमा आधारित परियोजना चलाएको बताए । उनले पोलियो उन्मुलनमा रोटरी क्लबको योगदान रहेको उल्लेख गरे । उनले रोटरी क्लबहरु विकास, शान्ति र शिक्षा क्षेत्रको साझेदार भएको दाबी गरे ।

कार्यक्रममा रोटरीका एसिस्टेन्ट गभर्नर माधवप्रसाद सिग्देल, रोटरी क्लब अफ पोखरा अध्यक्ष निर्मलप्रसाद कर्माचार्य, क्लबका पूर्व अध्यक्षहरु रामचन्द्र थापा, बाबुराम बराल र जितेन्द्र सिग्देल, रोटरी वर्ष २०२२-०२३का उपाध्यक्ष भूपालजंग कुँवरले रोटरीले शिक्षा, स्वास्थ्य, खानेपानी, वातावरण, महिला सशक्तीकरणको क्षेत्रमा गरेको योगदानको बारेमा बोलेका थिए ।