पोखरा ।
पोखरा महानगरपालिका अन्तर्गतको वैदेशिक रोजगारका लागि सुरक्षित आप्रवासन(सामी)परियोजनाको सूचना तथा परामर्श केन्द्रमा चालु आर्थिक वर्षको ०७८ पुस १ यताको अवधिमा ५ हजार ९ सय ५४ जनाले वैदेशिक रोजगारीसम्बन्धी सूचना र परामर्श सेवा लिएका छन् ।

वैदेशिक रोजगारीको सूचनामुलक जानकारी, अपनाउन पर्ने सावधानी र ध्यान दिनुपर्ने विषयका बारेमा काम गर्दै आएको केन्द्रमा पछिल्लो अवधिमा ३ हजार ४ सय ९६ पुरुष र २ हजार ४ सय ५८ महिलाले सेवा लिएको वैदेशिक रोजगार बोर्डका कार्यक्रम अधिकृत शिव रेग्मीले जानकारी दिए । उनले यो अवधिमा केन्द्रमा दर्ता भएका १ सय ६२ समस्या मध्ये ४५ वटामा सफलता पाएको जानकारी दिए ।

रेग्मीले १ सय १७ समस्या सुनुवाईको प्रक्रियामा रहेको बताए । ‘केन्द्रमा आएका समस्याको सहजीकरण र समन्वयमार्फत ३ करोड ४६ लाख ८१ हजार क्षतिपूर्ति दिलाउन सफल भएका छौं,’ उनले भने, ‘जसमध्ये २४ मुद्दा वैदेशिक रोजगारीको क्रममा खोजी उद्दार करार समस्या र शव झिकाउने सवालका परेकोमा १५ मुद्दा समाधान भएका छन् ।’ उनले वैदेशिक रोजगारीबारे सूचना, सीप र न्यायको पहुँचमा अभिवृद्धि गर्दै आएको परियोजनाको काम प्रभावकारी भएको दाबी गरे ।

नेपाल सरकार तथा स्वीस सरकारको द्विपक्षीय समझदारी अनुसार श्रम, रोजगार तथा सामाजिक सुरक्षा मन्त्रालयको सहजीकरणमा पोखरा महानगरको अगुवाईमा सीप हस्तान्तरणद्वारा सशक्तीकरण (नेष्ट) नेपालले परियोजना सञ्चालन गरेको छ । कास्कीको रुपमा बाहेक मादी, माछापुच्छ्रे र अन्नपूर्ण गाउँपालिकालाई परियोजना सञ्चालित छन् । परियोजनाका जिल्ला संयोजक कुमबहादुर गुरुङले चालु आर्थिक वर्षमा वैदेशिक रोजगारीको क्रममा ठगी, जालसाजी तथा पासपोर्ट होल्डमा कामदार र उनीहरुका परिवारलाई कानुनी सहायता प्रदान गरेको जानकारी दिए । उनले त्यस्ता १ सय ४ गुनासामध्ये १४ समस्या समाधान भएको र २७ आशिंक रुपमा समाधान भएको बताए ।

संयोजक गुरुङले विभिन्न सरकारी र गैर सरकारी निकायसँगको समन्वय र सहकार्यमा ४३ लाख १० हजार रुपैयाँ क्षतिपूर्ति वापतको रकम पीडितले पाएको जानकारी दिए । उनले यस आर्थिक वर्षमा वैदेशिक रोजगारीको क्रममा ज्यान गुमाएका, अंगभंग भएका र दीर्घरोग लागेका ३४ निवेदनमध्ये परियोजनाको सहजीकरणपछि वैदेशिक रोजगार बोर्डको सचिवालय र बिमा कम्पनीबाट मृतक कामदारका परिवारले २ करोड २७ लाख ७१ हजार र दीर्घरोग तथा अंगभंग भएका व्यक्तिले ७६ लाख गरी ३ करोड ३ लाख ७१ हजार रुपैयाँ क्षतिपूर्ति पाएको उल्लेख गरे ।

उनले यस वर्ष ५८ लाई व्यक्तिगत र ३ सय ४८ जनालाई सामूहिक रुपमा मनोसामाजिक परामर्श सेवा उपलब्ध गराएको जानकारी दिए । पोखरा महानगरपालिकामा ४ समूहलाई वित्तीय साक्षरता, विप्रेषणको सही सदुपयोग, ज्ञान सीप प्रदान गरेको जानकारी दिँदै उनले कास्कीका अन्य ३ पालिकामा सञ्चालित वित्तीय साक्षरता कक्षामा २ सय ५० जना सहभागी भएको बताए ।
उनले माछापुच्छ्रे का करिब १५ वर्ष सम्पर्कविहीन र रुपाका ७ वर्षदेखि सम्पर्कविहीनलाई खोज तथा उद्धारमा समन्वय र सहजीकरण गरी नेपाल ल्याएएको जानकारी दिए ।