पोखरा ।
पोखरा महानगरपालिका वडा नम्बर १३ का ५ हजार घरधुरीलाई कागतीका बिरुवा वितरण गरिएको छ । वातावरण मैत्री वडा बनाउने उद्देश्यले वडा कार्यालयले बिरुवा वितरण गरेको हो । वडाका टोल विकास संस्थाका अध्यक्षलाई शनिबार भेला गरी उनीहरुमार्फत प्रत्येक घरधुरीलाई १ वटा कागतीका विरुवा बाँडिएको वडाध्यक्ष किरण बरालले बताए ।

अध्यक्ष बरालले कागती स्वास्थ्यका दृष्टिकोणले पनि राम्रो भएकाले विरुवा रोपेपछि संरक्षण र सम्बर्धन गरी आयआर्जनको माध्यम बनाउन आग्रह गरे । उनले आफ्नो ५ वर्षे कार्यकालमा पोखराकै नमुना वडा बनाउने गरी आफूअघि बढेको सुनाए । एक घर एक कागती कार्यक्रम वडाको पर्यावरण र कृषि क्षेत्रतर्फको पहिलो कार्यक्रम भएको हुनाले यसलाई प्रभावकारी बनाउन सबै लाग्नुपर्ने वडा सदस्य सुचित तामाङले बताइन् ।

समाजसेवी गणेश आचार्यले वडाले दिएको कागतीको विरुवा सोही दिन रोपेको सुनाए । सोही कार्यक्रममा टोल विकास संस्थाकासँग योजना र सुझाव माग गरी छलफलसमेत भएको छ । वडाले ८ सामुदायिक विद्यालयका ३६ शिक्षकलाई स्थानीय पाठ्यक्रम प्रवोधिकरण तालिमसमेत दिएको छ ।

भद्रकाली मावि व्यवस्थापन समितिका अध्यक्ष लोकबहादुर कार्कीको अध्यक्षतामा भएको कार्यक्रममा पोखरा महानगरपालिका शिक्षा महाशाखाका वरिष्ठ अधिकृत वद्रिनाथ सुवेदी, ईन्द्रराज्य मावि लामाचौरका प्रधानाध्यापक केशव अमगाइ, भद्रकाली माविका प्रधानाध्यापक घनश्याम रिजाल र सहप्रधानाध्यापक राजेन्द्र भण्डारीले बोलेका थिए ।