पोखरा ।
पोखरामा नाटक ‘केस नम्बर ३११’ मञ्चन भइरहेको छ । गत शुक्रबारबाट पोखरा थिएटरको गन्धर्व नाटकघरमा मञ्चन भइरहेको नाटक असार ११ गतेसम्म देखाइनेछ ।

नाटक पोखरा थिएटरको प्रस्तुतिमा तयार भएको हो । यो नाटकको लेखन तथा निर्देशन पोखरा थिएटरको ब्याच ४ र व्याच ५ का प्रशिक्षार्थीले गरेका हुन् । सहजकर्ताको रुपमा पोखरा थिएटरका अध्यक्ष परिवर्तन छन् । नाटकमा झलक थापा, सुशील बराल, मनिषा केसी, अदित भुजेल र एलिसा भोगले गरेका छन् । गोपाल भुषाल, अनामिका रिजाल, प्रतीक राउत, प्रतिभा रिमाल, पाल्मती थापा, कमल तामाङ, दिप्सना विश्वकर्मा, सुरज तिवारी तथा दिव्य अमृतको अभिनयसमेत नाटकमा हेर्न पाइनेछ ।
नाटक बुधबारबाहेक हरेक दिन साँझ सवा ५ बजे मञ्चन गरिनेछ । यसका अलावा शनिबार र आइतबार दिउँसो १ बजेसमेत नाटक हेर्न पाइन्छ । यो नाटकको परिकल्पना दिव्य, अमृत, दिप्सना विश्वकर्मा र सुशील बरालले गरेका हुन् । हिंसाले पीडितमा पार्न सक्ने मानसिक असरलाई चित्रण गर्ने अभिप्रायले समसामयिक विषयमा नाटक तयार पार्न खोजेको निर्देशकत्रयको भनाइ छ । नाटक हेरिसकेपछि महिला हिंसा र मनोविज्ञानका सम्बन्धमा नयाँ अवधारणा बन्ने उनीहरुको अपेक्षा छ ।

पोखरा थिएटरमा पहिलो पटक इम्प्रोभाइजेस्नल विधिबाट नाटक तयार पारिएको हो । नाटकमा महिलामाथि हुने घटना र घटनाले पार्ने मानसिक असरलाई नयाँ तरिकाले प्रस्तुत गरिएको छ । यो नाटकले मूलतः डिसोसियटिभ आइडेन्टीटी डिसअर्डरको खोजी गर्न प्रेरित गरेको छ । कलाकारको मेहनतका कारण नाटक आकर्षक बनेको छ । नाटक हेर्न पुगेका दर्शकको प्रतिक्रियाका कारण कलाकारसमेत उत्साहित छन् ।