पोखरा ।
प्रभु बैंक गण्डकी प्रदेश कार्यालयले नेपाल रेडक्रस सोसाइटी कास्कीको गण्डकी प्रदेश स्तरको अत्याधुनिक रक्त सञ्चार सेवा (ब्लड बैक)सहितको बहुउद्देश्यीय भवन निर्माणका लागि १ लाख आर्थिक सहयोग गरेको छ । संस्थागत सामाजिक उत्तरदायित्व (सिएसआर) अन्तर्गत सहयोग गरेको बैंकका प्रदेश प्रमुख राजु रानाले जानकारी दिए ।

उनले रेडक्रसको भवन निर्माणमा सानो योगदान गरेर ईंट्टा थपेको बताए । उनले आगामी दिनमा समेत वित्तीय साक्षरता लगायत अन्य कार्यक्रममा समेत जोडिने बताए । नेपाल रेडक्रस सोसाइटी कास्की सभापति डोलराज पाण्डेले रेडक्रसलाई माया गर्नेबाट भएको सहयोगबाट भवन निर्माण हुँदै गरेको जानकारी दिए । ‘प्रभु बैंक नेपालको स्थापित बैंक हो,’ उनले भने, ‘बैंकले गरेको सहयोग हाम्रो लागि ठूलो हो । आगामी दिनमा समेत बंैकलाई जोडिन आग्रह गर्दछु ।’

सभापति पाण्डेले व्यक्तिगत, दातृ संस्थाको सहयोगमा विपद् व्यवस्थापनदेखि रक्त सञ्चार सेवालाई अगाडि बढाएको जानकारी दिए । उनले मनसुनी वर्षात सुरुवातसँगै बाढी, पहिरोबाट प्रभावितलाई राहात उद्दारमा रेडक्रमकर्मी खट्ने बताए । रेडक्रस सोसाइटी कास्की उपसभापति तथा भवन निर्माण समितिका संयोजक डण्डराज शर्माले ७ करोड ३२ लाख १३ हजार ७ सय ५८ लागतमा भवन बन्न लागेको जानकारी दिए । २०७६ फागुन १२ गते सम्झौता गरेको सिद्धार्थ कन्ट्रक्सन प्रालि चावाहिलले काम थालेको २४ महिनाभित्र भवन सक्ने लक्ष्य लिएको छ ।

अहिलेको पश्चिमाञ्चल स्वास्थ्य विज्ञान परिसरमा रामघाटको विकल्पमा सिर्जनाचोकमा अन्डरग्राउन्ड पार्किङसहित ३ तले भवन सुविधा सम्पन्न भवन बनाउन थालिएको छ । अपांगमैत्री लिफ्ट सहितको ब्लड बैंकको मुल भवनबाट प्रदेश स्तरको सेवा प्रदान गरिने उपसभापति डण्डराज शर्माले जानकारी दिए । नेपाल रेडक्रस सोसाइटी कास्कीका प्रमुख प्रशासकीय अधिकृत मोहनसिंह खड्काले गण्डकी प्रदेशकै गौरव तथा महत्वकाक्षी योजनालाई सफल पार्न सहयोग गर्न सबै स्थानीय संघ, संस्थालाई आग्रह गरे ।