काठमाडौं ।
नेपाली लेखक संघले १ लाख राशिको विशिष्ट लेखक पुरस्कार स्थापना गरेको छ । संघको शनिबार भएको दोस्रो पूर्ण बैठकले नेपाली साहित्य क्षेत्रमा महत्वपूर्ण योगदान पुर्‍याउनेस्रष्टालाई सो पुरस्कार अर्पण गर्ने निर्णय गरेको हो । संघका अध्यक्ष तीर्थ श्रेष्ठको अध्यक्षतामा बसेको बैठकले २०८० वैशाख १६ गतेदेखि हरेक वर्ष ‘लेखक दिवस’ मनाउन सुरुआत गर्ने निर्णय गरेको छ ।

उक्त दिन नेपाली लेखक संघका सबै प्रदेश तथा जिल्ला शाखालाई लेखक दिवस मनाउन निर्देशन दिने निर्णय बैठकले गरेको संघका सचिवालय सदस्य नवीनचन्द्र घिमिरेले जानकारी दिए । स्रष्टाहरूले राजनीति परिवर्तनका लागि चालेको सङ्गठनात्मक चेतको उच्च स्मरण गर्दै उक्त ऐतिहासिक दिनलाई नेपाली लेखक संघले ‘लेखक दिवस’ मनाउने निर्णय गरेको हो । उक्त दिवसकै अवसर पारेर प्रदान गरिने विशिष्ट लेखक पुरस्कारको अक्षयकोष स्थापना गर्न संघले आफ्नो तर्फबाट रकम संकलनसुरु गरेको छ ।

सो पुरस्कार प्रदान गर्न अक्षयकोषका लागि कार्यसमितिको तर्फबाट मात्रै ६ लाख संकलन भएको छ । सुरुआतमै निकै उत्साहपूर्वक स्वतस्फूर्त रकम संकलन भएको उक्त अक्षयकोषमा आगामी दिनमा पनि विभिन्न संघसंस्था र व्यक्तिबाट रकम संकलन गरी कोषमा कम्तीमा २० लाख पुर्‍याउने लक्ष्य लिइएको संघका अध्यक्ष श्रेष्ठले जानकारी दिए । उनले उक्त पुरस्कार वितरण गर्नका लागि कार्यविधि निर्माण गरी स्रष्टाबाट स्रष्टाका लागि प्रदान गरिएको रकमलाई व्यवस्थित गरिने जनाए ।