पोखरा ।
मानव अधिकारका लागि महिला एकल महिला समूह कास्कीले अन्नपूर्ण गाउँपालिकाबासीलाई लैंगिक हिंसा घटाउन गीतमार्फत सचेतना दिएको छ । कुर्वे परियोजनाको सहयोगमा भएको कार्यक्रममा लोकदोहोरी प्रतिष्ठानका सचिव जीवन दाहालले गीतमार्फत् लैंगिक हिंसा न्यूनीकरणबारे प्रकाश पारे । उनले महिलाले महिलालाई नै गर्ने हिंसा पनि अझै नहटेको जनाए ।

गीतमार्फत हिंसा घटाउन गरिएको आग्रहमा सहभागीले गायक दाहाललाई साथ दिएका थिए । पालिका अध्यक्ष विष्णुबहादुर केसीले लैंगिक हिंसा घटाउने अभियान घर घरबाटै सुरुआत गर्नुपर्नेमा जोड दिए । उनले पितृसत्तात्मक समाजका हुर्किएका पुरुषको चिन्तनमा परिवर्तन गर्दै यो अभियानमा महिला र पुरुषसँगसँगै अघि बढ्नुपर्ने उल्लेख गरे ।

उपाध्यक्ष चन्द्रकला अधिकारीले समाज अझै विभिन्न प्रकारका हिंसाबाट ग्रसित भएकाले सचेतना, कानुनी उपचार र सबैको सहकार्य जरुरी भएको बताइन् । उनले पालिकाले यसपालिको बजेटमा लैंगिक हिंसा न्यूनीकरणका लागि बजेट विनियोजन भएको जानकारी दिइन् ।

अन्नपूर्णका प्रमुख प्रशासकीय अधिकृत खेमराज देवकोटाले जीवनको अर्थ सहकार्य र प्रगति भएको उल्लेख गर्दै वैमस्य, हिंसा जस्ता प्रवृत्तिलाई निरुत्साहित गर्दै जानुपर्ने विचार राखे । एकल महिला समूह गण्डकी अध्यक्ष प्रमिला तझ्याले कस्तो व्यवहार हिंसा हो भन्ने बुझ्न र बुझाउन जरुरी भएको बताइन् । महिलामा पनि एकल महिला लैंगिक हिंसा र उपेक्षाको सबैभन्दा बढी शिकार हुने गरेको उनले सुनाइन् ।

समूह कास्की अध्यक्ष जूना केहीले हिंसा सभ्य समाजका लागि नसुहाउने उल्लेख गर्दै यसैका लागि यस्ता कार्यक्रम जरुरी भएको बताइन् । संस्थाले सचेतनाका विभिन्न कार्यक्रम गरी एकल महिललाई अघि बढाउन भूमिका निर्वाह गर्दै आएको जनाइन् ।
संस्थाका उपाध्यक्ष विष्णु सुवेदीको अध्यक्षतामा भएको कार्यक्रममा अन्नपूर्ण वडा नं. २ का अध्यक्ष पीताम्बर भण्डारी, संस्थाका सचिव विष्णु श्रेष्ठ लगायतले बोलेका थिए ।