पोखरा ।
पोखरामा क्रियाशील जनप्रदीप सहयोगी संस्थाले नवनिर्वाचित जनप्रतिनिधिलाई सम्मान गरेको छ । यो जनप्रदीप माविवाट २०४७ सालमा प्रवेशिका परीक्षा दिएका पूर्व विद्यार्थीको संस्था हो ।

संस्थाले विद्यालयको शैक्षिक तथा भौतिक विकासमा योगदान गरेको छ । सो संस्थाले शनिबार आँधीखोला गाउँपालिका वडा नं ४ का नवनिर्वाचित अध्यक्ष सिंहबहादुर क्षेत्री, वडा नं ६ का महिला सदस्य कमला पौडेल ढकाल, फेदीखोला २ का महिला सदस्य एवं संस्थाका उपाध्यक्ष कलावती बस्नेतलाई सम्मान गरिएको हो ।

संस्थाका प्रमुख संरक्षक ठाकुरप्रसाद शर्मा, अध्यक्ष डोलनाथ गौतम चोलाकान्त, कोषाध्यक्ष गीता पौडेल लगायतले उनीहरुलाई सम्मान गरेका हुन् । वडाध्यक्ष क्षत्रीले चिलाउनेवासको विकासमा संस्थाले छोटो समयमा महत्वपूर्ण भूमिका खेलेको भन्दै प्रशंसा गरे । संस्थाका प्रमुख संरक्षक शर्माले पोखरामै रहेर पनि गाउँको शैक्षिक तथा भौतिक विकासमा चासो राख्नु निकै महत्वपूर्ण भएको उल्लेख गरे ।