पोखरा ।
गण्डकी प्रदेशका अर्थमन्त्री रामजीप्रसाद बरालले असार १ गते प्रस्तुत गरेको बजेटमा सत्तारुढ दलबीच नै विवाद हुँदा बजेट छलफल अझै सुरु हुन सकेको छैन । निर्वाचन क्षेत्र पूर्वाधार विकास कार्यक्रम अन्तर्गतको बजेट अर्थमन्त्री रामजीप्रसाद बरालले हटाएको भन्दै सत्तारुढ दलबाट विरोध भएसँगै १६ दिन बितिसक्दा पनि बजेट छलफल अनिश्चित बनेको हो ।

असार ५ गते बोलाइको बैठक बजेटकै विषयमा सहमति नहुँदा अन्तिम समयमा आएर बैठक स्थगित भएको थियो । त्यसयता बैठक बस्न सकेको छैन । सहमतिका लागि बिहीबार मुख्यमन्त्री, अर्थमन्त्री र सत्तारुढ दल माओवादीबीच छलफल भएको छ । छलफलमा माओवादीले निर्वाचन क्षेत्र पूर्वाधार विकास कार्यक्रम पूर्वाधारमै खर्च गर्न गरी समावेश गर्ने गरी प्रस्ताव गरेको माओवादी संसदीय दलका नेता हरिबहादुर चुमानले जानकारी दिए ।

सकेसम्म सोही नामबाटै कार्यक्रम लैजाने र नभए नाम परिर्वतन गरेर भए पनि उक्त कार्यक्रम समावेश गर्न प्रस्ताव बैठकमा राखेको सांसद चुमानले बताए । बिहीबार बिहान माओवादी संसदीय दलको बैठक बसेको थियो ।