पोखरा ।
पोखरामा श्रीमद् बितक चर्चा शब्द दर्शन तथा श्रीकृष्ण कथा कार्यक्रम हुने भएको छ । पोखरा ८ रत्नचोकस्थित श्री कृष्ण प्रणामी मन्दिरको आयोजनामा हुने सो कार्यक्रम साउन २ देखि भदौ ३ गतेसम्म चल्नेछ । भदौ ३ गते श्रीकृष्ण जन्माष्टमी प्राकट्य महोत्सव पनि गरिनेछ ।

कार्यक्रममा गुरुजी बाणी तथा बितक कथाकार युवा धर्म प्रचारक श्यामदास महाराजले संगीतमय कथा प्रवचन गर्ने छन् । ‘धार्मिक तथा आध्यात्मिक जागरणका लागि कार्यक्रम महत्वपूर्ण रहनेछ,’ मन्दिरका अध्यक्ष पुरुषोत्तम रेग्मीले भने ।

कार्यक्रममा हरेक दिन बिहान ११ देखि दिउँसो २ बजेसम्म चल्नेछ । दैनिक करिब ३ सय सुन्दरसाथजी भक्तजनको सहभागिता रहने अनुमान गरिएको छ । अहिले कार्यक्रमको तयारी तीव्र पारिएको छ । मन्दिर स्थापना काल २०४८ देखि नै बर्सेनि कार्यक्रम गर्ने गरिएको छ । कार्यक्रम सम्पन्न गर्नका लागि ७ लाख रुपैयाँ खर्च लाग्ने अनुमान गरिएको छ ।

भक्तजनबाट प्राप्त दान, भेटीबाट कार्यक्रमको खर्च व्यवस्थापन गरिनेछ । बचत भएको रकम मन्दिरको भौतिक पूर्वाधार निर्माणका लागि खर्च गर्ने योजना छ । कार्यक्रमको प्रचारप्रसार गर्दै असार ३२ गते मोटरसाइकल र्‍याली निकालिनेछ । कार्यक्रम उद्घाटनअघि साउन २ गते कलश यात्रा गर्ने तय छ । साउन २७ गते रक्षबन्धनका दिन विशेष कार्यक्रम हुने जनाइएको छ ।