पोखरा ।
पोखरा वडा नम्बर १२ स्थित शीतलादेवी मन्दिरमा स्थापना भएको १ सय ९० वर्षपछि बुधबार पहिलोपटक महाआरती गरिएको छ । वडाअध्यक्ष सन्तोष बास्तोलाका अनुसार विसं १८८९ मा स्थापना भएको मन्दिरमा अहिलेसम्म महाआरती भएको थिएन ।

‘शीतलादेवीमा अहिलेसम्म आरती भएको थिएन, मैले आफ्नो चुनावी घोषणा पत्रमा नै भनेको थिएँ मन्दिरमा महाआरती आयोजना गर्छु । मैले त्यति धेरै मान्छे शीतला देवी मन्दिरमा कहिले देखेको थिइनँ । मैले वचन पूरा गरें,’ वडाअध्यक्ष बास्तोलाले भने ।

महाआरतीको समयमा करिब ६ सय जना संलग्न भएको वडाध्यक्ष बास्तोलाले जानकारी दिए । महाआरतीमा पोखरा महानगरपलिकाका मेयर धनराज आचार्यले पूजा गरेका थिए । महाआरती पूर्व मन्दिरमा विधिपूर्वक पूजा आयोजना गरी ४ बटुकले ‘स्वस्ति वाचन’ गरेका थिए । मेयर आचार्यले वडातहबाट भए पनि चुनावी घोषणापत्र कार्यान्वयन हुनु सुखद भएको बताए ।

पण्डित भुवन आचार्यको अगुवाइमा पूजा भएको थियो । मन्दिरका पुजारी मुक्ति आचार्य छन् । शीतलादेवी मन्दिरका सेवा समिति अध्यक्ष भुवन आचार्य छन् । अबदेखि प्रत्येक महिना महाआरती आयोजना गरिने वडाध्यक्ष बास्तोलाले जनाए ।